നെടുങ്കണ്ടം: മലയോരമേഖലയായ നെടുങ്കണ്ടം പച്ചടി ശ്രീനാരായണ എൽ.പി സ്കൂളിലെ എല്ലാ കുട്ടികളും എഴുത്തുകാരായി മാറിയ വായനാദിനമായിരുന്നു ഇത്തവണത്തേത്. ഈ സ്കൂളിലെ ഒന്നാം ക്ലാസ് മുതൽ നാലാം ക്ലാസ് വരെയുള്ള മുഴുവൻ കുട്ടികളും സ്വന്തമായി ഒരു പുസ്തകം രചിച്ചിരിക്കുന്നുവെന്നതാണ് പ്രത്യേകത. അത് ഇന്നലെ പൊതുവേദിയിൽ പ്രകാശനം ചെയ്തു. ഈ കുട്ടികളുടെ പുസ്തകങ്ങൾ സ്‌കൂൾ ലൈബ്രറിയിലേക്ക് സംഭാവന നൽകും. ഇത്യാദ്യമായല്ല ഈ സ്കൂളിലെ കുട്ടികൾ എഴുത്തുകാരാകുന്നത്. കഴിഞ്ഞ മൂന്നു വർഷമായി എസ്.എൻ.എൽ.പി സ്‌കൂൾ ഈ പ്രവർത്തനം നടത്തുന്നുണ്ട്. ഇതിനോടകം 550ലേറെ പുസ്തകങ്ങൾ കുട്ടികളുടെ വകയായി സ്‌കൂളിൽ എത്തിക്കഴിഞ്ഞു. ക്ലാസിലെ പഠനപ്രവർത്തനങ്ങളുടെ ഭാഗമായി തയ്യാറാക്കപ്പെടുന്ന കഥകൾ, കവിതകൾ, വിവരണങ്ങൾ, കുസൃതി കണക്കുകൾ, ചിത്രങ്ങൾ എന്നിവയാണ് കുട്ടികളുടെ പോർട്ട്‌ഫോളിയോ, കൈയെഴുത്ത് മാസിക എന്നിവയിലൂടെ തരംതിരിച്ച് എഡിറ്റ് ചെയ്ത് വർഷാവസാനം അദ്ധ്യാപകർ പുസ്തകരൂപത്തിലേക്ക് മാറ്റുന്നത്. ഏതായാലും ഒരു വിദ്യാലയത്തിലെ എല്ലാവരെയും എഴുത്തുകാരാക്കിയ ത്രില്ലിലാണ് പച്ചടി സ്കൂളിലെ അദ്ധ്യാപകരും രക്ഷിതാക്കളും. സ്‌കൂൾ ഹെഡ്മാസ്റ്റർ ബിജു പുളിക്കലേടത്തിന്റെ നേതൃത്വത്തിലുള്ള അദ്ധ്യാപകരും സജി ചാലിൽ മാനേജരായ മാനേജ്‌മെന്റ് കമ്മിറ്റിയും അനിൽ വലിയവീട്ടിൽ, ബിജി മരിയ ചാണ്ടി എന്നിവർ നേതൃത്വം നൽകുന്ന പി.ടി.എ ഭരണസമിതിയുമാണ് പഠന പ്രവർത്തനങ്ങൾക്ക് നേതൃത്വം നൽകുന്നത്.