ചെറുതോണി: തന്റെ കൺമുന്നിൽ കാണുന്ന ഏത് വിഷയവും നിമിഷ നേരത്തിനുള്ളിൽ ചെറുകഥയാക്കി മാറ്റി ഇവാന എന്ന കൊച്ചുമിടുക്കി സാഹിത്യരംഗത്ത് തന്റെ സ്ഥാനം ഉറപ്പിക്കുകയാണ്. ഇടുക്കി ന്യൂമാൻ എൽ.പി സ്‌കൂളിൽ രണ്ടാം ക്ലാസിൽ പഠിക്കുന്ന ഇവാന സതീഷ് ക്ലാസിൽ പഠിക്കുമ്പോൾ തന്നെ തന്റെ പ്രതിഭ തെളിയിച്ചിരുന്നു.അക്ഷരങ്ങളോട് ചങ്ങാത്തം കൂടിയതുമുതൽ വായനയും എഴുത്തുമെല്ലാം ഈ കുഞ്ഞ് എഴുത്തുകാരിയുടെ ഇഷ്ടവിഷയങ്ങളായി. പ്രായത്തിൽ കവിഞ്ഞ ആവിഷ്‌കരണ ചാരുതയോടെ രചിക്കപ്പെട്ട ചെറുകഥകളിൽ പ്രകൃതി സനേഹം, ഈശ്വര ഭക്തി, വെളിച്ചം,സഹാനുഭൂതി, സർഗാത്മകത തുടങ്ങിയവ എല്ലാം മിഴിവാർന്നുനിൽക്കുന്നു. സ്‌കൂൾ ഹെഡ്മിസ്ട്രസ് സിസ്റ്റർ സുദീപ സി. എം. സി. യുടെയും മറ്റ് അദ്ധ്യാപകരുടെയും മാതാപിതാക്കളുടെയും പിന്തുണയോടെ എഴുത്തിന്റെ മേഖലയിൽ മുന്നേറുന്ന ഇവാനയുടെ 12 ചെറുകഥകളുടെ സമാഹാരം തേൻതുള്ളികൾ പ്രകാശനം ചെയ്തു. ന്യൂമാൻ എൽ.പി സ്‌കൂളിൽ സ്റ്റുഡൻസ് പൊലീസ് കേഡറ്റ് ചുമതല വഹിക്കുന്ന മോട്ടിവേഷഷന് സ്പീക്കർകൂടിയായ സബ് ഇൻസ്‌പെക്ടർ അജി അരവിന്ദ് ബ്ലോക്ക് പഞ്ചായത്ത് അംഗം ഡിറ്റാജ് ജോസഫിന് കൈമാറി പുസ്തകം പ്രകാശനം ചെയ്തു.ഫെഡറൽ ബാങ്ക് ഉദ്യോഗസ്ഥൻ സതീഷ് ജോസഫ് -അനീറ്റ സതീഷ് എന്നിവർ മാതാപിതാക്കളാണ്.