പാലാ: കോട്ടയം പാർലമെന്റ് മണ്ഡലം തിരഞ്ഞെടുപ്പിൽ തോമസ് ചാഴികാടനോ ഫ്രാൻസീസ് ജോർജിനോ വിജയം? നിലവിലെ മുനിസിപ്പൽ കൗൺസിലറും മുൻ കൗൺസിലറും തമ്മിലുള്ള പന്തയംവയ്പ്പ് അരലക്ഷം രൂപയ്ക്കായിരുന്നു.

ചാഴികാടൻ ജയിക്കുമെന്ന് മുനിസിപ്പൽ കൗൺസിലർ. ഫ്രാൻസീസ് ജോർജ് ജയിക്കുമെന്ന് മുൻ മുനിസിപ്പൽ കൗൺസിലർ. ഇരുവരും തമ്മിലുള്ള പന്തയം വയ്പ്പിൽ മദ്ധ്യസ്ഥനായിട്ട് നിന്നത് പാലായിലെ ഒരു പ്രമുഖ വ്യാപാരി. എന്തായാലും ചാഴികാടനുവേണ്ടി പന്തയംപിടിച്ച നിലവിലെ മുനിസിപ്പൽ കൗൺസിലർക്ക് അരലക്ഷം രൂപ പോയി. മുൻ മുനിസിപ്പൽ കൗൺസിലർക്ക് തുക കിട്ടുകയും ചെയ്തു. വോട്ടെണ്ണലിന്റെ അന്ന് വൈകുന്നേരത്തോടെ തന്നെ മദ്ധ്യസ്ഥനായ വ്യാപാരിയിൽ നിന്നും മുൻ മുനിസിപ്പൽ കൗൺസിലർ അമ്പതിനായിരം രൂപ ഏറ്റുവാങ്ങി.

ഫ്രാൻസീസ് ജോർജ് ജയിക്കുമെന്ന് പതിനഞ്ച് ലക്ഷം രൂപയ്ക്കുവരെ പന്തയംപിടിക്കാൻ തയ്യാറാണെന്ന് താൻ പലവട്ടം പലരോടും പറഞ്ഞിരുന്നെങ്കിലും ആരും ഇതിനായി മുന്നോട്ട് വന്നില്ലെന്ന് മുൻ മുനിസിപ്പൽ കൗൺസിലർ പറഞ്ഞു.