പാലാ: ജില്ലാ പഞ്ചായത്ത് പദ്ധതിയിൽ ഉൾപ്പെടുത്തി മീനച്ചിൽ പഞ്ചായത്തിലെ പാലാക്കാടു വാർഡിൽ വട്ടോത്ത് ഭാഗം കുടിവെള്ളപദ്ധതിക്ക് രണ്ട് ഘട്ടമായി മുപ്പത് ലക്ഷം രൂപ അനുവദിച്ചതായി ജില്ലാ പഞ്ചായത്തംഗം രാജേഷ് വാളിപ്ലാക്കൽ പറഞ്ഞു. ഒന്നാം ഘട്ടത്തിൽ 20 ലക്ഷം രൂപയും രണ്ടാംഘട്ടത്തിൽ 10 ലക്ഷം രൂപയുമാണ് അനുവദിച്ചിരിക്കുന്നത്. മുപ്പതിനായിരം ലിറ്റർ സംഭരണശേഷിയുള്ള ഓവർഹെഡ് ടാങ്ക്, ഒരു കിലോമീറ്റർ പമ്പിംഗ് ലൈൻ, അരക്കിലോമീറ്റർ വിതരണ ലൈനുകളുമാണ് ഒന്നാംഘട്ടത്തിൽ പൂർത്തീകരിച്ചത്. രണ്ടാംഘട്ടത്തിൽ കിണറിന് ആഴം വർദ്ധിപ്പിക്കുകയും 400 മീറ്റർ വിതരണ ലൈനുകളും നിർമ്മിക്കും. നൂറിലധികം കുടുംബങ്ങൾക്ക് വട്ടോത്ത് ഭാഗം കുടിവെള്ള പദ്ധതിയുടെ പ്രയോജനം ലഭിക്കും.

മീനച്ചിൽ പഞ്ചായത്ത് പ്രസിഡന്റ് സാജോ പൂവത്താനിയുടെ അധ്യക്ഷതയിൽ ചേർന്ന യോഗത്തിൽ രാജേഷ് വാളിപ്ലാക്കൽ നിർമ്മാണ ഉദ്ഘാടനം നിർവഹിച്ചു.പഞ്ചായത്ത് വൈസ് പ്രസിഡന്റ് ലിൻസി മാർട്ടിൻ, പഞ്ചായത്ത് മെമ്പർമാരായ ബിജു തുണ്ടിയിൽ, സോജൻ തൊടുക, ജോയികുഴിപ്പാല , ഷേർളി ബേബി , ജയശ്രീ സന്തോഷ് ,ബിജു കുമ്പളന്താനം, ബിന്ദു ശശികുമാർ, ബിനോയി നരിതൂക്കിൽ, പെണ്ണമ്മ തോമസ്, സിബി ഈറ്റത്തോട്ട്, പി.ടി ജോസഫ്, ലിൻസ് അരീക്കതാഴെ തുടങ്ങിയവർ പ്രസംഗിച്ചു.

ഫോട്ടോ അടിക്കുറിപ്പ് : ജില്ലാ പഞ്ചായത്ത് പദ്ധതിയിൽ ഉൾപ്പെടുത്തി മീനച്ചിൽ പഞ്ചായത്തിലെ പാലാക്കാട് വാർഡിൽ നിർമ്മിക്കുന്ന വട്ടോത്തുഭാഗം കുടിവെള്ള പദ്ധതിയുടെ രണ്ടാംഘട്ട നിർമ്മാണ പ്രവർത്തനങ്ങളുടെ ഉദ്ഘാടനം ജില്ലാ പഞ്ചായത്ത് മെമ്പർ രാജേഷ് വാളിപ്ലാക്കൽ നിർവഹിക്കുന്നു .