ഒളശ്ശ : അയ്മനം പഞ്ചായത്ത് പതിനേഴാം വാർഡ് വട്ടുകളം ലക്ഷം വീട്ടിൽ അനിൽ പിള്ള, ഭാര്യ വനജ, മകൾ പരാശക്തി (6) എന്നിവർ താമസിച്ചിരുന്ന വീടിന്റെ മേൽക്കൂര ഇന്നലെ വൈകുന്നേരം തകർന്നു വീണു. കനത്ത മഴയിൽ ഓടിട്ട വീടിന്റെ മേൽക്കൂരയിൽ വെള്ളം ഇറങ്ങിയതിനെ തുടർന്ന് കൂട്ട് തകർന്നതാകാം മേൽക്കൂര ഇടിഞ്ഞുവീഴാൻ കാരണം.
കട്ടിലിൽ ഇരിക്കുകയായിരുന്ന മകൾ പരാശക്തിയെ ശബ്ദം കേട്ട ഉടൻ അച്ഛൻ തള്ളി മാറ്റിയതിനാൽ കുട്ടി നിസാരമായ പരിക്കുകളോടെ രക്ഷപ്പെട്ടു. ഈ കൂര തകർന്ന് അനിലിന്റെ ദേഹത്തേക്ക് വീണതിനാൽ വാരിയെല്ലിന് പൊട്ടൽ ഉണ്ടായി. തുടർന്ന് ചികിത്സയ്ക്കായി സ്വകാര്യ ആശുപത്രിയിൽ പ്രവേശിപ്പിച്ചു. ഭാര്യ വനജ ഇതേ സമയം മുറിക്ക് വെളിയിൽ ആയിരുന്നതിനാൽ അപകടത്തിൽ നിന്നും രക്ഷപ്പെട്ടു.
അനിൽ പിള്ളയും ഭാര്യ വനജയും രോഗികളാണ്.

മഴക്കാലമായതിനാൽ ഒന്നാം ക്ലാസിൽ പഠിക്കുന്ന കുട്ടിയുമായി എവിടെ താമസിക്കും എന്ന് അറിയാതെ വിഷമിച്ചിരിക്കുകയാണ് രോഗികളായ ഈ നിർധന കുടുംബം.