പാലാ : കനത്ത മഴയിൽ ഹോസ്റ്റൽ കെട്ടിടത്തിന്റെ മതിലിടിഞ്ഞ് വീടിന് മുകളിലേക്ക് വീണു. വീട് ഭാഗികമായി തകർന്നു. പാലാ ഗവ. സ്‌കൂളിന് സമീപമുള്ള കണ്ടനാംപറമ്പിൽ ബേബി ജോസഫിന്റെ വീടാണ് തകർന്നത്.

ഉച്ചയോടെ ആരംഭിച്ച പെരുമഴയെത്തുടർന്ന് മരിയ റാണി കോൺവന്റ്‌ ഹോസ്റ്റലിന്റെ കരിങ്കൽകെട്ടും ഭിത്തിയും ഇടിഞ്ഞ് വീഴുകയായിരുന്നു. ബേബി ജോസഫിന്റെ കൊച്ചുമകൾ പ്ലസ് 1 വിദ്യാർത്ഥിനിയായ ആൽഫി വിനോദ് ഈ സമയം കട്ടിലിൽ കിടക്കുകയായിരുന്നു. വലിയ ശബ്ദംകേട്ട് ഓടിമാറിയ ആൽഫി അദ്ഭുതകരമായി രക്ഷപ്പെടുകയായിരുന്നു. വീടിന്റ ഒരു ഭാഗം മണ്ണിനടിയിലായി.