 2.25 കോടി സഞ്ചാരികൾ

തിരുവനന്തപുരം:വിനോദസഞ്ചാരികളുടെ വരവിൽ സർവകാല റെക്കോർഡിട്ട് കേരളം. 2023ൽ 2.25 കോടി സഞ്ചാരികളാണ് കേരളം സന്ദർശിച്ചത്. കൊവിഡിന് മുമ്പുള്ളതിനേക്കാൾ വലിയ വർദ്ധനവാണിത്. 2020ലെ കോവിഡ് ലോക്ക് ഡൗണിൽ വിനോദ സഞ്ചാരികളുടെ വരവിൽ 72.77 ശതമാനം കുറഞ്ഞിരുന്നു. എന്നാൽ 2021ൽ 42.56 ശതമാനം വർദ്ധിച്ചു.

2022ൽ സഞ്ചാരികളുടെ വരവ് ഇരട്ടിയിലധികമായി, 152 ശതമാനമായിരുന്നു വർദ്ധന. 2023ൽ 17.22 ശതമാനം വളർച്ചയാണ് നേടിയത്. 21,871,641 ആഭ്യന്തര വിനോദസഞ്ചാരികളും 649,057 വിദേശ സഞ്ചാരികളുമാണ് കഴിഞ്ഞ വർഷം സംസ്ഥാനത്തെത്തിയത്. ആഭ്യന്തര വിനോദ സഞ്ചാരികളുടെ വരവിൽ സർവകാല റെക്കോർഡാണ് സംസ്ഥാനം സ്വന്തമാക്കിയത്. 2021ൽ 75,37,617 ആഭ്യന്തര വിനോദസഞ്ചാരികളിൽ നിന്ന് 2023ൽ 1,88,67,414 ആയി ഉയർന്നു. കൊവിഡിന് മുമ്പുള്ള 1,83,84,233 എന്ന ഏറ്റവും ഉയർന്ന സന്ദർശകരുടെ റെക്കോർഡിനേക്കാൾ കൂടുതലാണിത്.

കൊവിഡ് വെല്ലുവിളിക്ക് ശേഷം കേരളത്തിലെ ടൂറിസം മേഖല അസാധാരണമായ തിരിച്ചുവരവാണ് നടത്തിയത്. നൂതന മാർക്കറ്റിംഗ് തന്ത്രങ്ങളും ശക്തമായ പൊതുസ്വകാര്യ പങ്കാളിത്തവും ശക്തമായ വളർച്ചയ്ക്ക് കാരണമായി.

മന്ത്രി പി.എ മുഹമ്മദ് റിയാസ്