രാജ്യത്തെ ഏറ്റവും വെല്ലുവിളി നിറഞ്ഞ പരീക്ഷയാണ് യൂണിയൻ പബ്ലിക് സർവീസ് കമ്മിഷൻ നടത്തുന്ന സിവിൽ സർവീസ് പരീക്ഷ. പരീക്ഷയിൽ വിജയം നേടാൻ ശരിയായ സമീപനവും തന്ത്രങ്ങളും വ്യക്തമായ പ്ലാനിംഗും ആവശ്യമാണ്.
സിവിൽ സർവീസ് പരീക്ഷയ്ക്ക് തയ്യാറെടുക്കണോ എന്നുള്ള തീരുമാനമാണ് ഏറെ പ്രധാനം. തീരുമാനം വളരെ വസ്തുനിഷ്ഠമായിരിക്കണം. പരീക്ഷയ്ക്ക് തയ്യാറെടുപ്പു തുടങ്ങി മാസങ്ങൾക്കുശേഷം പിൻവാങ്ങുന്ന വിദ്യാർത്ഥികളുമുണ്ട്. അതിനാൽ വ്യക്തമായി ആലോചിച്ചു തീരുമാനമെടുക്കണം. തീരുമാനിച്ചു കഴിഞ്ഞാൽ പിൻവാങ്ങരുത്.
സിവിൽ സർവീസ് പരീക്ഷയിൽ ഏറ്റവും കൂടുതൽപേർ പരാജയപ്പെടുവാനുള്ള കാരണം എന്തെന്ന് വ്യക്തമാക്കുകയാണ് മുൻ ചീഫ് സെക്രട്ടറിയും എഴുത്തുകാരനുമായ കെ. ജയകുമാർ.
''ഇപ്പോഴത്തെ കുട്ടികൾക്ക് ഒരുപാട് ട്രെയിനിംഗ് ഓപ്പർച്യൂണിറ്റീസ് ഉണ്ടെന്നത് നല്ല കാര്യം. പക്ഷേ നമ്മൾ പഠിക്കുന്നത് പോലിരിക്കും നമ്മുടെ വിജയം. ആർക്കും നമ്മളെ പഠിപ്പിക്കാൻ സാദ്ധ്യമല്ല, എങ്ങിനെ പഠിക്കാം എന്നു പറഞ്ഞുതരാനേ പറ്റൂ. നമ്മുടെ വിജയവും പരാജയവും തീരുമാനിക്കുന്നത് നമ്മൾ തന്നെയാണ്.
പരീക്ഷയുടെ സ്വഭാവത്തിൽ മാറ്റം വന്നിട്ടുണ്ടെങ്കിലും ആത്യന്തികമായി എന്താണ് പരീക്ഷിക്കപ്പെടുന്നത്? നിങ്ങൾക്ക് ഈ വിഷയത്തിൽ എത്രത്തോളം അറിവും വ്യാപ്‌തിയുമുണ്ടെന്നാണ്. എന്തു ചോദ്യം ചോദിച്ചാലും സിലബസിനുള്ളിലും അതുമായി ബന്ധപ്പെട്ടമുള്ള കാര്യങ്ങൾ ഗഹനമായി അറിഞ്ഞിരിക്കുക എന്നതാണ് വേണ്ടത്. ഗോ ബിയോൻഡ് ദി സിലബസ്. ഏറ്റവും ഗാഢമായി പഠിക്കണം. സിവിൽ സർവീസ് ജയിക്കുന്നത് അത്ര ഇംപോസിബിൾ ആയിട്ടുള്ള കാര്യമല്ല. പക്ഷേ പരാജയപ്പെടുന്നത് പഠനത്തിന്റെ പരിമിതി കൊണ്ടാണ്.
ലക്ഷക്കണക്കിന് പേപ്പറുകൾ വാല്യൂ ചെയ്യുകയാണ്. നമ്മളേക്കാളും പ്രഗത്ഭരായവരാണ് ഒപ്പം പരീക്ഷ എഴുതുന്നത് എന്ന ചിന്തയുണ്ടാകണം. നമ്മളേക്കാളും മുകളിൽ കുറച്ചുപേരെ പാടുള്ളൂ. നമ്മളോടൊപ്പം മത്സരിക്കുന്ന കുട്ടികൾ മോശക്കാരാണെന്ന് ഒരിക്കലും വിചാരിക്കരുത്. അവർ നമ്മളേക്കാൾ കൂടുതൽ പഠിച്ചുവന്നിരിക്കുകയാണ്. അതിനും മുകളിലായി എനിക്ക് എപ്പോൾ പോകാൻ സാധിക്കുമെന്ന് ഒരു പഠിതാവ് കരുതുന്നുവോ അപ്പോൾ മാത്രമേ സിവിൽ സർവീസ് പഠനം ശരിയായ ദിശയിൽ പോവുകയുള്ളൂ''.
ലക്ഷക്കണക്കിന് വിദ്യാർത്ഥികൾ തയ്യാറെടുക്കുന്ന മത്സര പരീക്ഷയാണ് സിവിൽ സർവീസ്. ഒഴിവുകൾ ആയിരത്തോളം മാത്രം! പക്ഷെ തികഞ്ഞ ആത്മാർത്ഥത, ശുഭാപ്തിവിശ്വാസം, പോസിറ്റീവ് എനർജി എന്നിവ നിലനിറുത്തിക്കൊണ്ടുള്ള തയ്യാറെടുപ്പുകൾ വിജയം കൈവരിക്കാൻ സഹായിക്കും. ശരാശരി വിദ്യാർത്ഥികളാണ് പരീക്ഷയിൽ 75 ശതമാനവും വിജയിക്കുന്നത്. മാത്രമല്ല പരീക്ഷയ്ക്ക് തയ്യാറെടുക്കുന്നതിലൂടെ ഉദ്യോഗാർത്ഥികൾക്ക് മറ്റു പ്രവേശന പരീക്ഷകളിലും വിജയം കൈവരിക്കാൻ സാധിക്കും.
തയ്യാറെടുപ്പ് എപ്പോൾ തുടങ്ങണം?
ഹൈസ്‌കൂൾസ്‌കൂൾ തലം തൊട്ട് സിവിൽ സർവീസ് തയ്യാറെടുപ്പ് തുടങ്ങുന്ന വിദ്യാർത്ഥികളുണ്ട്. പതിവായി മലയാളം, ഇംഗ്ലീഷ് ദിനപത്രങ്ങൾ വായിച്ച് പൊതുവിജ്ഞാനം മെച്ചപ്പെടുത്തണം. താത്പര്യമുള്ള വിഷയങ്ങൾ പ്ലസ്ടു കോമ്പിനേഷനായി തിരഞ്ഞെടുക്കണം. ബിരുദമാണ് പരീക്ഷയ്ക്ക് വേണ്ട അടിസ്ഥാന യോഗ്യത. അതിനാൽ ഏറെ താത്പര്യമുള്ള ബിരുദം നേടാനാണ് ശ്രമിക്കേണ്ടത്. എട്ടാം ക്ലാസ്‌മുതൽ പ്ലസ് ടു വരെയുള്ള സോഷ്യൽ സയൻസ് പുസ്തകങ്ങൾ നന്നായി പഠിക്കണം. ഇന്ത്യാ ചരിത്രം, ഇന്ത്യൻ ഭരണഘടന, ഭൂമിശാസ്ത്രം, പൊളിറ്റിക്കൽ സയൻസ് എന്നിവയിൽ മികച്ച അറിവ് വേണം. സിവിൽ സർവീസ് പരീക്ഷയുടെ സിലബസ് വ്യക്തമായി മനസിലാക്കിയിരിക്കണം. സിലബസിനനുസരിച്ചുള്ള റഫറൻസ് പുസ്തകങ്ങൾ കണ്ടെത്തണം. മാതൃഭാഷയിലുള്ള പ്രാവീണ്യം, ഇംഗ്ലീഷ് പ്രാവീണ്യം, ആശയ വിനിമയം എന്നിവ മെച്ചപ്പെടുത്താൻ ശ്രമിക്കണം. മികച്ച അറിവ്, മനോഭാവം, സ്‌കിൽ അഥവാ തൊഴിൽ നൈപുണ്യം എന്നിവ വിജയ മന്ത്രങ്ങളാണ്.
പരീക്ഷയെക്കുറിച്ചു വേണം വ്യക്തമായ ധാരണ
പരീക്ഷയിൽ പ്രിലിമിനറി, മെയിൻ, ഇന്റർവ്യൂ എന്നിങ്ങനെ മൂന്ന് ഘട്ടങ്ങളുണ്ട്. ഇതിനാവശ്യമായ സ്‌കില്ലും വ്യത്യസ്തമാണ്. പൊതുവിജ്ഞാനത്തിലുള്ള അറിവ്, അനലിറ്റിക്കൽ സ്‌കിൽ എന്നിവ മെച്ചപ്പെടുത്തണം. തയ്യാറെടുപ്പു രീതികളും തന്ത്രങ്ങളും ഇടയ്ക്കിടെ മാറ്റരുത്. വായനാശീലം മെച്ചപ്പെടുത്തുന്നതോടൊപ്പം പതിവായി കുറിപ്പുകൾ തയ്യാറാക്കണം. ഒബ്ജക്ടീവ് മാതൃകയിലുള്ള ചോദ്യങ്ങൾക്ക് ഉത്തരം കണ്ടെത്തി പ്രിലിമിനറി പരീക്ഷയിലെ സി.പി.ടിക്ക് തയ്യാറെടുക്കണം. പതിവായി ദിവസേന എട്ടു മണിക്കൂറെങ്കിലും തയ്യാറെടുക്കണം. പഠിച്ച ഭാഗങ്ങൾ ആഴ്ചതോറും സിലബസ്, ചോദ്യപേപ്പർ എന്നിവയ്ക്കനുസരിച്ച് പുനരവലോകനം ചെയ്യണം. മുൻവർഷങ്ങളിലെ ചോദ്യങ്ങൾ, മാതൃകാ ചോദ്യങ്ങൾ എന്നിവ വിലയിരുത്തണം. പരമാവധി മുൻവർഷങ്ങളിലെ ചോദ്യങ്ങൾക്ക് ഉത്തരം കണ്ടെത്താൻ ശ്രമിക്കണം. ഓപ്ഷണൽ വിഷയങ്ങൾ, ഉപന്യാസം, എത്തിക്‌സ് പേപ്പറുകൾക്ക് പ്രാധാന്യം നൽകണം.
വിദ്യാർത്ഥികളുടെ അറിവ്, മനോഭാവം, മാനസിക ശക്തി എന്നിവയാണ് വിലയിരുത്തുന്നത്. പഠനകാലയളവിലുടനീളം പോസിറ്റീവ് മനോഭാവം പുലർത്തണം. ദിവസേന പതിവായി വ്യായാമം ചെയ്യാനും, ആരോഗ്യദായകമായ ഭക്ഷണം കഴിക്കാനും ശ്രമിക്കണം.