കരിയറിന്റെ വിജയഘട്ടത്തിൽ അതുപേക്ഷിച്ച് മറ്റൊരു വ്യത്യസ്ത പാത തിരഞ്ഞെടുക്കുന്നത് വലിയൊരു ചലഞ്ചാണ്. വിജയത്തിന്റെ ഉന്നതിയിൽ നിൽക്കുന്ന സമയം തികച്ചും വ്യത്യസ്‌തമായ പാത തിരഞ്ഞെടുക്കാൻ ധൈര്യവും ആത്മവിശ്വാസവും ഉണ്ടായിരിക്കണം. പുതിയ പാത വിജയത്തിലെത്തിക്കാനുള്ള ചങ്കൂറ്റവും. ഇത്തരത്തിൽ അഭിനയ രംഗത്ത് മികച്ച വിജയത്തിൽ എത്തിനിൽക്കെ അതുപേക്ഷിച്ച് ബിസിനസ് ആരംഭിച്ച് ഇന്ന് 830 കോടി ആസ്‌തി മൂല്യമുള്ള കമ്പനിയുടെ സ്ഥാപകയായി അനേകംപേർക്ക് പ്രചോദനമാകുന്നയാളാണ് ആഷ്‌ക ഗോരാഡിയ.

നിരവധി ഹിറ്റ് ടെലിവിഷൻ പരമ്പരകളിലൂടെ പ്രശസ്‌തിയിലേക്കുയർന്ന താരമാണ് ആഷ്‌ക. 2002ൽ 'അച്ചാനക് 37 സാൽ ബാദ്' എന്ന പരമ്പരയിലൂടെയാണ് ആഷ്‌ക അഭിനയരംഗത്ത് എത്തുന്നത്. ഇതിലെ കുമുദ് എന്ന കഥാപാത്രം ഏറെ ശ്രദ്ധിക്കപ്പെട്ടു. പിന്നാലെ അകേല, സിന്തൂർ തെരേ നാം കാ, മേരെ അപ്‌ന, വിരുദ്ധ് എന്നീ സീരിയലുകളിൽ മികച്ച കഥാപാത്രങ്ങളെ അവതരിപ്പിച്ചു. നെഗറ്റീവ് കഥാപാത്രങ്ങളെ അവതരിപ്പിച്ചാണ് ഏറെ പ്രശസ്‌തയായത്. നിരവധി റിയാലിറ്റി ഷോകളുട‌െയും ഭാഗമായി. 2019ലെ 'ദായൻ' എന്ന പരമ്പരയിലാണ് അവസാനമായി അഭിനയിച്ചത്. ഇതിനുശേഷമാണ് ആക്‌ടിംഗ് കരിയർ ഉപേക്ഷിച്ച് ബിനിനസ് രംഗത്ത് എത്തുന്നത്.

2020ലാണ് സുഹൃത്തുക്കളായ അശുതോഷ് വലാനി, പ്രിയങ്ക് ഷാ എന്നിവരോടൊപ്പം ചേർന്ന് സൗന്ദര്യവർദ്ധക വസ്‌തുക്കളുടെ ബിസിനസ് ആരംഭിക്കാൻ തീരുമാനിക്കുന്നത്. തുടർന്നായിരുന്നു 'റെനീ കോസ്‌മെറ്റിക്‌സ്' എന്നപേരിൽ വിപണിയിലെത്തുന്നത്. വെറും രണ്ടുവർഷം കൊണ്ട് 834 കോടി രൂപ മൂല്യമുള്ള കമ്പനിയായി വളർന്നിരിക്കുകയാണ് റെനി കോസ്‌മെറ്റിക്‌സ്. ഈ സാമ്പത്തിക വർഷത്തിൽ കമ്പനിയുടെ മൂല്യം 400 കോടിയാക്കുകയെന്നതാണ് ലക്ഷ്യമെന്ന് അടുത്തിടെ ഒരു അഭിമുഖത്തിൽ ആഷ്‌ക പറഞ്ഞിരുന്നു. അഹമ്മദാബാദ് ആസ്ഥാനമായി പ്രവർത്തിക്കുന്ന കമ്പനി 2022 ഡിസംബറിൽതന്നെ 25 മില്യൺ കോടിയുടെ മൂല്യത്തിലെത്തിയിരുന്നു. റെനി കോസ്‌മെറ്റിക്‌സ് ഓൺലൈനിലും ലഭ്യമാണ്. രാജ്യത്തുടനീളമായി 650ൽ അധികം സ്റ്റോറുകളും കമ്പനിക്കുണ്ട്. സൗന്ദര്യവർദ്ധക രംഗത്തെ പ്രമുഖരായ ഫൽഗുനി നയ്യാറുടെ നൈക, വിനീത സിംഗിന്റെ സുഗർ കോസ്‌മെറ്റിക്‌സ് എന്നിവരുമായാണ് റെനീ കോസ്‌മെറ്റിക്‌സ് മത്സരിക്കുന്നത്.