ആയൂർവേദത്തിൽ ഏറ്റവും പ്രധാനപ്പെട്ട സസ്യങ്ങളിൽ ഒന്നാണ് തുളസി. നമ്മുടെ ശരീരത്തിന് വേണ്ട ഒരുപാട് ഗുണങ്ങൾ തുളസിക്കുണ്ട്. അതുകൊണ്ട് തന്നെ നമ്മുടെയൊക്കെ വീട്ടിൽ ഒരു തുളസിച്ചെടിയെങ്കിലും നട്ടുവളർത്താറുമുണ്ട്. തുളസിയിൽ ആന്റിഓക്സിഡന്റ് ഗുണങ്ങൾ അടങ്ങിയത് കൊണ്ട് തുളസി മികച്ച ആരോഗ്യം നൽകും, കൂടുതൽ പേരും ചായയ്‌ക്കൊപ്പം തുളസിയും ചേർത്ത് കഴിക്കാറുണ്ട്. ഇത് വഴി നമ്മുടെ ആരോഗ്യത്തിന് ലഭിക്കുന്ന ഗുണങ്ങൾ എന്തൊക്കെയാണെന്ന് നോക്കാം.

മഴക്കാലത്ത് ഉണ്ടാകുന്ന ചുമ, തൊണ്ടവേദന തുടങ്ങിയ ശ്വാസകോശ സംബന്ധമായ പ്രശ്നങ്ങൾക്ക് പരിഹാരം കാണുന്നതിന് അനുയോജ്യമായ ഔഷധമാണിത്. അതുകൊണ്ട് ചായയിൽ ഒരു തുളസിയില ചേർക്കുന്നത് നല്ലതാണ്. തുളസിയിൽ ആന്റി ബാക്ടീരിയൽ, ആന്റിഫംഗൽ ഗുണങ്ങൾ അടങ്ങിയിട്ടുണ്ട്, ഇത് നിങ്ങളുടെ മൊത്തത്തിലുള്ള ആരോഗ്യം വർദ്ധിപ്പിക്കുകയും മഴക്കാലത്ത് വൈറൽ രോഗങ്ങളിൽ നിന്ന് നിങ്ങളെ സംരക്ഷിക്കുകയും ചെയ്യുന്നു.

രാവിലെ തുളസിയിട്ട ചായ കുടിക്കുന്നത് രക്തത്തിലെ പഞ്ചസാരയുടെ അളവ് നിയന്ത്രിക്കുകയും നിങ്ങളുടെ ശരീരത്തിലെ ഇൻസുലിൻ സംവേദനക്ഷമത മെച്ചപ്പെടുത്തുകയും നിങ്ങളുടെ ഹൃദയാരോഗ്യം വർദ്ധിപ്പിക്കുകയും ചെയ്യും. ആരോഗ്യകരമായ ദഹനത്തെ പ്രോത്സാഹിപ്പിക്കുകയും വയറുവേദനയും ദഹനക്കേടും ഒഴിവാക്കുകയും ചെയ്യുന്ന കാർമിനേറ്റീവ് ഘടകങ്ങൾ തുളസിയിലുണ്ട്. കൂടാതെ, ഈ ഹെർബൽ ചായ നിങ്ങൾ അനുഭവിക്കുന്ന സമ്മർദ്ദവും ഉത്കണ്ഠയും കുറയ്ക്കുകയും നിങ്ങളുടെ ശരീരത്തെ കൂടുതൽ ശാന്തമാക്കുകയും വിശ്രമകരമാക്കുകയും ചെയ്യുന്നു.