കൊച്ചി : കൊച്ചിയിൽ ഇന്ന് നടന്ന മലയാള സിനിമാതാരങ്ങളുടെ സംഘടനയായ അമ്മയുടെ ജനറൽ ബോഡിയിൽ പങ്കെടുക്കാൻ കേന്ദ്രമന്ത്രിയും നടനുമായ സുരേഷ്‌ഗോപി എത്തി. 27 വർഷത്തിന് ശേഷം ആദ്യമായാണ് സുരേഷ് ഗോപി അമ്മയുടെ ജനരൽ ബോഡിയിൽ പങ്കെടുക്കുന്നത്. സംഘടനയുടെ ഭാരവാഹികളുടെ തിരഞ്ഞെടുപ്പ് കൂടി നടക്കുന്ന ജനറൽ ബോഡിയിൽ പങ്കെടുക്കാൻ വോട്ടെടുപ്പ് തീരുന്നതിന് തൊട്ടുമുൻപാണ് സുരേഷ് ഗോപി എത്തിയത്. തുടർന്ന് സുരേഷ് ഗോപി വോട്ടുരേഖപ്പെടുത്തുകയും ചെയ്തു.

സുരേഷ് ഗോപിയെ ഉപഹാരം നൽകിയാണ് അമ്മ പ്രസിഡന്റ് മോഹൻലാൽ വരവേറ്റത്. കേന്ദ്രമന്ത്രി പദവിയിലെത്തിയ സുരേഷ് ഗോപിയെ താരസംഘടന ആദരിക്കുകയും ചെയ്തു. പുതുക്കിയ അംഗത്വ കാർഡും സുരേഷ് ഗോപിക്ക് നൽകി. ഒരു സ്റ്റേജ് ഷോയുമായി ബന്ധപ്പെട്ട തർക്കത്തെ തുടർന്നാണ് 1997ൽ സുരേഷ് ഗോപി അമ്മയിൽ നിന്ന് വിട്ടുനിന്നത്. വർഷങ്ങൾക്ക് ശേഷം 2022ൽ അമ്മ സംഘടിപ്പിച്ച ഉണർവ് എന്ന മെഡിക്കൽ ക്യാമ്പിൽ സുരേഷ് ഗോപി പങ്കെടുത്തിരുന്നു. എന്നാൽ ജനറൽ ബോഡി മീറ്റിംഗിൽ പങ്കെടുക്കുന്നത് കാൽനൂറ്റാണ്ടിന് ശേഷമാണ്.