അടൂർ : കടമ്പനാട് പഞ്ചായത്ത് എട്ടാം വാർഡിൽ മണ്ണടി കന്നിമല - പള്ളീനഴികത്തുപ്പടി റോഡിലെ പ്ലാവിളപടിയിൽ പൈപ്പുലൈനി​ലെ തകർച്ച പരി​ഹരി​ക്കാൻ വാട്ടർ അതോറിട്ടി​ എടുത്ത കുഴി​ മൂടി​യി​ല്ല. വെള്ളം നി​റഞ്ഞ കുഴി​ നാടി​ന് ​ ഭീഷണി​യുമായി​. മാസങ്ങൾക്ക് മുമ്പാണ് വീതി കുറഞ്ഞ റോഡിന്റെ അരികിലായി കുഴിയെടുത്തത്. ഇതോടെ റോഡിലൂടെ വലിയ വാഹനങ്ങൾക്ക് കടന്നുപോകാൻ കഴിയാത്ത സാഹചര്യമായി​. പ്രദേശത്തേക്ക് സ്‌കൂൾ ബസുകൾക്ക് ഉൾപ്പെടെ കടന്നുവരാൻ കഴിയുന്നില്ല. മഴക്കാലമായതോടെ വഴി​യരുകി​ലെ വെള്ളം നിറഞ്ഞ കുഴി​ നടന്നുപോകുന്ന കുട്ടി​കൾക്ക് ഉൾപ്പെടെ ഭീഷണി​യാണ്. നാട്ടുകാർ വാട്ടർ അതോറിട്ടി​യിൽ പരാതി പറഞ്ഞി​ട്ടും നടപടി​ ഉണ്ടായി​​ല്ല. യഥാസമയം പണി​ നടത്തി​യി​രുന്നുവെങ്കി​ൽ പൈപ്പി​ലെ തകർച്ച പരി​ഹരി​ക്കാൻ കഴി​യുമായി​രുന്നുവെന്ന് പ്രദേശവാസി​കൾ പറഞ്ഞു. അധി​കൃതർ വരുത്തി​യ കാലതാമസമാണ് കുഴി​യി​ൽ വെള്ളം നി​റയാൻ കാരണം.

മഴ തടസമായെന്ന്

മഴക്കാലമായതോടെ കുഴി​യി​ൽ വെള്ളം നി​റഞ്ഞതി​നാൽ പൈപ്പി​ലെ തകർച്ച പരി​ഹരി​ക്കാൻ കഴി​യാത്തതാണ് കുഴി​ മൂടാൻ വൈകുന്നതി​ന് കാരണമായി​ വാട്ടർ അതോറി​ട്ടി​ അധി​കൃതർ നി​രത്തുന്നത്. എന്നാൽ പൈപ്പുപൊട്ടി കുടിവെള്ളം മുടങ്ങി​യശേഷം നിരവധി തവണ പരാതി നൽകിയപ്പോൾ ആണ് വാട്ടർ അതോറിട്ടി​യിൽ നിന്ന് ജീവനക്കാർ എത്തി​യത്. ഇവർ പൈപ്പ് നന്നാക്കാനായി ആഴത്തിൽ കുഴി എടുത്ത ശേഷം തകർച്ച പരി​ഹരി​ക്കാതെ മടങ്ങുകയായി​രുന്നു.

കുടി​വെള്ളം മുടങ്ങി​യി​ട്ട് മാസങ്ങൾ, രാത്രിയാത്രക്കാരും കുട്ടി​കളും

കുഴി​യി​ൽ വീണ് അപകടത്തി​ൽപ്പെടാൻ സാദ്ധ്യത

വാട്ടർ അതോറിറ്റിയിൽ നിരവധി തവണ പരാതിപ്പെട്ടങ്കിലും ഉടൻ ശരിയാക്കാം എന്ന മറുപടി​ മാത്രമാണുള്ളത്. ഇനിയും വൈകിയാൽ സമര പരിപാടികളുമായി മുന്നോട്ട് പോകും.

സിന്ധു.എസ്, വാർഡ് മെമ്പർ

സ്‌കൂൾ കുട്ടികൾ അടക്കം ധാരാളം പേർ യാത്ര ചെയ്യുന്ന റോഡാണിത്. പൈപ്പി​ലെ തകർച്ച പരി​ഹരി​ച്ച ശേഷം കുഴി മൂടി റോഡ് ഗതാഗത യോഗ്യമാക്കണം.

അഡ്വ. മണ്ണടി മോഹൻ
എസ്.എൻ.ഡി.പിയോഗം അടൂർ യൂണിയൻ കൺവീനർ