ആറന്മുള: വീട്ടിൽ കിടന്നുറങ്ങിയ രണ്ടുപേർ ഉൾപ്പടെ മൂന്നുപേരെ തെരുവുനായ കടിച്ചു. ആറന്മുള പരപ്പുഴക്കടവ് തോട്ടത്തിൽ അനിൽ (44), തമിഴ്‌നാട് സ്വദേശി ഗോകുൽ (20) എന്നിവരെയാണ് വീട്ടിൽ കയറി നായ കടിച്ചത്. റോഡിൽ കൂടി നടന്നുപോയ തമിഴ്‌നാട് സ്വദേശി വിഘ്‌നേഷി​നും കടിയേറ്റു. ഇവർ കോഴഞ്ചേരി ഗവ.ആശുപത്രിയിൽ ചികിത്സ തേടി. ഇന്നലെ ഉച്ചയ്ക്ക് 12നാണ് സംഭവം. വീട്ടിലെ കട്ടിലിൽ കിടന്നുറങ്ങുകയായിരുന്നു അനിൽ. മുൻഭാഗത്തെ വാതിലിലൂടെ അകത്തെത്തിയ നായ അനിലിന്റെ കാലിൽ കടിച്ചു. തുടർന്ന് വാടകവീട്ടിൽ കിടന്നുറങ്ങിയ തമിഴ്‌നാട് സ്വദേശി ഗോകുലിന്റെ വയറും കടിച്ചുപറിച്ചു.