കൊച്ചി: ഡോക്ടേഴ്‌സ് ദിനത്തോടനുബന്ധിച്ച് ഇന്ത്യൻ മെഡിക്കൽ അസോസിയേഷനും ഹെൽത്ത് ഫോർ ആൾ ഫൗണ്ടേഷനും ചേർന്ന് സംസ്ഥാനത്തെ മികച്ച ഡോക്ടർക്ക് നൽകുന്ന പുരസ്‌കാരം ഡോ.ഉമ്മൻ വർഗീസിന് ലഭിച്ചു.
ചെങ്ങന്നൂരിലെ ഡോ.ഉമ്മൻസ് ഐ ഹോസ്പിറ്റൽ മെഡിക്കൽ ഡയറക്ടറാണ് ഇദ്ദേഹം. 50000 രൂപയും പ്രശസ്തിപത്രവും ആർട്ടിസ്റ്റ് ആനന്ദ ബാബു രൂപ കല്പന ചെയ്ത ശില്പവും അടങ്ങുന്നതാണ് പുരസ്‌കാരം. ഡോക് ടേഴ്‌സ് ദിനമായ ജൂലായ് ഒന്നിന്ന് ആലപ്പുഴ ഐ. എം.എ. ഹാളിൽ നടക്കുന്ന ചടങ്ങിൽ ഗോവ ഗവർണർ പി.എസ്.ശ്രീധരൻ പിള്ള പുരസ്‌കാരം നൽകും.
കാഴ്ചയുടെ സമ്മാനം എന്ന പേരിൽ നടപ്പാക്കിയ സ്വന്തം പദ്ധതിയിലൂടെ നിർദ്ധനരായ നിരവധി കാഴ്ച പരിമിതർക്ക് ഡോ.ഉമ്മൻ വർഗീസ് സൗജന്യമായി കാഴ്ച ലഭ്യമാക്കിയിരുന്നു. സ്വമൂഹിക സാംസ്‌കാരിക രംഗങ്ങളിലും ഇദ്ദേഹം സജീവ സാന്നിദ്ധ്യമാണ്.
ഭാര്യ: മാലക്കര സെന്റ് തോമസ് ആശുപത്രിയിലെ സീനിയർ കൺസൾട്ടന്റ് ഫിസിഷ്യൻ ഡോ. സൂര്യ ഉമ്മൻ, മകൾ: ജെമി ആൻ ഉമ്മൻ ( ബിലീവേഴ്‌സ് ചർച്ച് മെഡിക്കൽ കോളേജ് വിദ്യാത്ഥിനി). കൊല്ലം മെഡിക്കൽ കോളേജ് പ്രിൻസിപ്പൽ ഡോ. ബി. പദ്മകുമാർ (ചെയർമാൻ) ഐ.എം.എ. പ്രസിഡന്റ് ഡോ. മനീഷ് നായർ, ഇൻഫർമേഷൻ ആന്റ് പബ്‌ളിക്ക് റിലേഷൻസ് വകുപ്പ് റിട്ട. ഡപ്യൂട്ടി ഡയറക്ടർ ചന്ദ്രഹാസൻ വടുതല, അക്കാദമി ഓഫ് പൾമണറി ആന്റ് ക്രിട്ടിക്കൽ കെയർ മെഡിസിൻ മുൻ ദേശീയ പ്രസിഡന്റ് പി.എസ്. ഷാജഹാൻ എന്നിവർ ഉൾപ്പെട്ട ജഡ്ജിംഗ് കമ്മറ്റിയാണ് അവാർഡ് ജേതാവിനെ തിരഞ്ഞെടുത്തത്‌