കൊല്ലം: നഗരത്തി​ലെ ഒട്ടുമി​ക്ക ബസ് സ്‌റ്റോപ്പുകളിലെല്ലാം വെയിലും മഴയുമേറ്റ് യാത്രക്കാർ വലഞ്ഞിട്ടും ബസ്‌ കാത്തിരിപ്പ് കേന്ദ്രം പുനർ നിർമ്മിക്കാൻ അധികൃതർ തയ്യാറാകുന്നി​ല്ല. നഗരഹൃദയത്തിലെ കോൺവെന്റ് ജംഗ്ഷനിൽ ചിന്നക്കട, കൊട്ടിയം, ആശ്രാമം ഭാഗത്തേക്കുള്ള ബസുകൾ നിറുത്തി​യി​രുന്ന കാത്തിരിപ്പ് കേന്ദ്രം വർഷങ്ങൾക്ക് മുൻപ് പൊളിച്ചു നീക്കിയിരുന്നു. മേൽപ്പാലത്തിന്റെ പണി പൂർത്തിയാകുന്ന മുറയ്ക്ക് പുനർ നിർമ്മിക്കുമെന്ന് പറഞ്ഞിരുന്നെങ്കിലും ഇതുവരെ ഒന്നുമുണ്ടായി​ല്ല.

ജില്ലാ ആശുപത്രിയിലും മറ്റുമെത്തുന്ന നൂറുകണക്കിന് യാത്രക്കാരാണ് മേൽപ്പാലത്തോടു ചേർന്നുള്ള ബസ് സ്റ്റോപ്പി​ൽ പ്രതി​ദി​നം കാത്തു നി​ൽക്കുന്നത്. വെയിലിന്റെ കാഠിന്യം വർദ്ധിക്കുമ്പോൾ മേൽപ്പാലത്തിന്റെ അടിയിലേക്ക് കയറി നിന്നാണ് രക്ഷപ്പെടുന്നത്. ഇരിപ്പിടങ്ങൾ ഇല്ലാത്തതും യാത്രക്കാരെ ബുദ്ധിമുട്ടിലാക്കുന്നുണ്ട്. യാത്രക്കാരുടെ എണ്ണം വർദ്ധിക്കുമ്പോൾ മേൽപ്പാലത്തിന്റെ അടിയിലും നിൽക്കാനാകാത്ത അവസ്ഥയാകും. ബസ് കാത്തുനി​ൽക്കുന്നവർ ഇതോടെ ഫുട്പാത്തിലുൾപ്പെടെ നി​റയും. വി​ദ്യാർത്ഥി​കളും വൃദ്ധരുമുൾപ്പെടെയുള്ളവർ കോൺ​വെന്റ് ജംഗ്ഷനി​ൽ വല്ലാതെ ബുദ്ധി​മുട്ടുകയാണ്. യാത്രക്കാർ നിരവധി തവണ പരാതി പറഞ്ഞിട്ടും പരിഹാരമായിട്ടില്ല.

സാമൂഹിക വിരുദ്ധ ശല്യവും

സന്ധ്യ മയങ്ങിയാൽ കോൺവെന്റ് ജംഗ്ഷനിലെ ബസ് സ്‌റ്റോപ്പുകൾ സാമൂഹിക വിരുദ്ധരുടെ കേന്ദ്രമാണ്. കാത്തിരിപ്പ്‌കേന്ദ്രം ഇല്ലാത്തതും തെരുവ് വിളക്കുകൾ തെളി​യാത്തതുമാണ് ഇത്തരക്കാാർക്ക് തുണയാകുന്നത്. രാത്രിയായാൽ ഇവി​ടെ ബസ് കാത്ത് നിൽക്കുന്നവരെ ഡ്രൈവർമാർക്ക് കാണാൻ സാധിക്കാത്ത അവസ്ഥയാണ്. ഇതുവഴി കടന്നു പോകുന്ന വാഹനങ്ങളുടെ വെളിച്ചം മാത്രമാണ് ഏക ആശ്രയം. തെരുവുനായ്ക്കളുടെ ശല്യവും അസഹനീയം. എത്രയും വേഗം കാത്തിരിപ്പ് കേന്ദ്രം സ്ഥാപി​ക്കണമെന്നാണ് ആവശ്യം.