കണ്ണനല്ലൂർ: കുരീപ്പള്ളിയിൽ മൊബൈൽ കമ്പനി ഉപേക്ഷിച്ചു പോയ ടവർ, ഇടിമിന്നലുണ്ടാകുമ്പോൾ പ്രദേശവാസി​കൾക്കു ഭീഷണി​യാവുന്നു. 15 വർഷം മുമ്പാണ് തമിഴ്‌നാട് കേന്ദ്രമായ കമ്പനി ഭൂവുടമയുമായി കരാറുണ്ടാക്കി ടവർ സ്ഥാപിച്ചത്. എന്നാൽ വാടക മുടങ്ങി​യത് കരാൽ ലംഘനമായി​. കമ്പനി​യുമായി​ ഭൂവുടമ ബന്ധപ്പെടാൻ ശ്രമിച്ചെങ്കിലും ഫലമുണ്ടായി​ല്ല.

ഇതിനിടെ, കരാറുണ്ടാക്കിയവർ ഭൂവുടമ അറിയാതെ മറ്റൊരു സേവനദാതാവിനു ടവർ കൈമാറാൻ ശ്രമിച്ചു. ഇതി​നെ എതിർത്തതോടെ മൊബൈൽ കമ്പനി നിയമ നടപടിയിലേക്ക് നീങ്ങിയെങ്കിലും പിന്നീട് കേസ് വഴിയിൽ ഉപേക്ഷിച്ചു. വാടക മുടങ്ങിയതിന് പിന്നാലെ കെ.എസ്.ഇ.ബി ബില്ലും കുടിശ്ശി​കയായതോടെ കണകഷൻ വിച്ഛേദിക്കപ്പെട്ടു. എങ്കിലും ഇടിമി​ന്നലുണ്ടാകുമ്പോൾ കൂറ്റൻ ലോഹ ടവറിലേക്ക് വൈദ്യുതി പ്രവഹിച്ച് പ്രദേശത്തെ വീടുകളി​ലെ ഉപകരണങ്ങളും വൈദ്യുതീകരണവും ഇതി​നോടകം പല തവണ നശിച്ചു. അടുത്തിടെ ലക്ഷങ്ങൾ മുടക്കിയാണ് തൊട്ടടുത്ത വീട്ടി​ൽ റീ വയറിംഗ് നടത്തിയത്. ഉപയോഗശൂന്യമായ ടവറിനുള്ളിലൂടെ വൃക്ഷങ്ങൾ വളരുന്നുണ്ട്.

മൊബൈൽ കമ്പനി അടച്ചു പൂട്ടിയതോടെ ടവർ ഇളക്കി മാറ്റാൻ ആരെ സമീപിക്കണമെന്ന ആശങ്കയി​ലാണ് വീട്ടുകാർ.