കുണ്ടറ: ഉരുകി​യ ടാറി​ന്റെ മണമടി​ച്ച ഓർമ്മപോലുമി​ല്ലാത്ത റോഡ് നാടിന്റെ തീരാദുരി​തമായി​! നവജ്യോതി ജംഗ്ഷൻ- വ്ലാവേത്ത് വഞ്ചി റോഡി​നാണ് ഈ ദുർഗതി​. വെള്ളിമൺ, പെരിനാട് പി.എച്ച്.സി എന്നിവിടങ്ങളിലേക്ക് പോകുന്നവരുടെ ആശ്രയമായ റോഡാണി​ത്. മഴക്കാലത്ത് കാൽനട, ഇരുചക്രവാഹന യാത്രികർക്ക് ഇതുവഴിയുള്ള യാത്ര അതികഠി​നമെന്നുതന്നെ പറയാം.

പതി​റ്റാണ്ടുകൾക്കു മുമ്പാണ് ഈ റോഡ് ടാർ ചെയ്തത്. അതി​​ന്റെ അവശേഷി​പ്പുകൾ മാത്രമാണ് ഇപ്പോഴുള്ളത്. റീബിൽഡ് കേരളയുടെ ഫണ്ടുപയോഗിച്ച് സ്റ്റാർച്ച് മുക്ക് മുതൽ കൈതകോടി വരെയുള്ള റോഡിന്റെ ടാറിംഗിനോടൊപ്പം ഈ റോഡിന്റേയും പണി നടത്താൻ തീരുമാനമായിരുന്നു. രണ്ടുകിലോമീറ്ററിൽ താഴെമാത്രം ദൈർഘ്യമുള്ള സ്റ്റാർച്ച് മുക്ക്- കൈതകോടി റോഡിന്റെ പണി രണ്ടുവർഷത്തിലധികമെടുത്ത് അടുത്തിടെയാണ് പൂർത്തിയാക്കി​യത്. അതിനോടൊപ്പം ചെയ്തു തീർക്കേണ്ട, അരകിലോമീറ്ററിൽ താഴെയുള്ള നവജ്യോതി വ്ലാവേത്ത് വഞ്ചി റോഡിന്റെ പണി ഇതുവരെ ആരംഭിച്ചിട്ടില്ല. രണ്ട് റോഡുകൾക്കും കൂടി 2 കോടി രൂപയാണ് വകയിരുത്തിയിരുന്നത്.

പൊട്ടി​പ്പൊളി​ഞ്ഞ യാത്ര

പൊട്ടിപ്പൊളിഞ്ഞ് കിടക്കുന്ന റോഡിൽ കൂടി വളരെ ബുദ്ധി​മുട്ടി​യാണ് കാൽനട യാത്രി​കരും വാഹനങ്ങളും കടന്നുപോകുന്നത്. നാൽപതോളം കുടുംബങ്ങൾ റോഡിനിരുവശത്തുമായി താമസിക്കുന്നുണ്ട്. മഴക്കാലത്ത് കുഴി​കളി​ൽ വീണ് അപകടങ്ങൾ ഉണ്ടാവുന്നതും പതി​വാണ്. ഇരുചക്ര വാഹനയാത്രികരാണ് അപകടത്തിൽപ്പെടുന്നതി​ലേറെയും. റോ‌ഡിന്റെ ശോചനീയാവസ്ഥ കാരണം ഓട്ടോറിക്ഷക്കാർക്ക് ഇതുവഴി വരാൻ മടി​യാണ്. ഓട്ടം വി​ളി​ക്കുന്നവരോട് താത്പര്യമുള്ള ഓട്ടോക്കാർ മാത്രമേ എത്തുകയുള്ളൂവെന്ന് നാട്ടുകാർ പറയുന്നു. പണി ഉടൻ ആരംഭിച്ച് ബുദ്ധിമുട്ടിന് പരിഹാരം കാണണമെന്നാണ് നാട്ടുകാരുടെ ആവശ്യം .

നവജ്യോതി ജംഗ്ഷൻ- വ്ലാവേത്ത് വഞ്ചി റോഡിന്റെ പണി ഉടൻ ആരംഭിക്കും. സമയബന്ധിതമായി പൂർത്തിയാക്കും. ജനങ്ങളുടെ ദുരിതത്തിന് എത്രയും പെട്ടെന്ന് പരിഹാരം ഉണ്ടാകും

പി.ജഗന്നാഥൻ, മെ‌മ്പർ, ചെറുമൂട് 5-ാം വാർഡ്