കൊല്ലം: കൊല്ലത്ത് സി.ജി.എച്ച്.എസ് (സെൻട്രൽ ഗവ. ഹെൽത്ത് സ്കീം) വെൽനസ് സെന്റർ ആരംഭിക്കാനുള്ള നടപടികൾ ത്വരിതപ്പെടുത്തണമെന്ന് ആവശ്യപ്പെട്ട് എൻ.കെ. പ്രേമചന്ദ്രൻ എം.പി കേന്ദ്ര ആരോഗ്യ വകുപ്പ് മന്ത്രി ജെ.പി​. നദ്ദ, കേന്ദ്ര ആരോഗ്യ വകുപ്പ് സെക്രട്ടറി, സി.ജി.എച്ച്.എസ് ഡയറക്ടർ എന്നിവർക്ക് നിവേദനം നൽകി​.

പതിനേഴാം ലോക്‌സഭയുടെ കാലയളവിൽ വെൽനെസ് സെന്റർ കൊല്ലത്ത് ആരംഭിക്കുമെന്ന് കേന്ദ്ര ആരോഗ്യ വകുപ്പ് മന്ത്രി ഉറപ്പ് നൽകിയിരുന്നതാണ്. ഇത് സംബന്ധിച്ച് സി.ജി.എച്ച്.എസ് അഡി​ഷണൽ ഡയറക്ടർ നൽകിയ ശുപാർശയിന്മേലുള്ള നടപടികൾ അന്തിമ ഘട്ടത്തിലാണ്. സെന്റർ ആരംഭിക്കാൻ കേന്ദ്രസർക്കാർ പുതുക്കി നിശ്ചയിച്ചിട്ടുള്ള മാനദണ്ഡങ്ങളുടെ പരിധിയിൽ കൊല്ലം ഉൾപ്പെടും. കൊല്ലം, പത്തനംതിട്ട, ആലപ്പുഴ ജില്ലകളുടെ തെക്കൻ മേഖലയി​ലെ വൃദ്ധരായ സി.ജി.എച്ച്.എസ് ഗുണഭോക്താക്കൾ നിലവിൽ 70 മുതൽ 150 കിലോമീറ്റർ വരെ സഞ്ചരിച്ചാൽ മാത്രമേ ആനുകൂല്യം ലഭിക്കുകയുള്ളൂ. നടപടികൾ പൂർത്തിയാക്കി അടിയന്തിരമായി വെൽനെസ് സെന്റർ ആരംഭിക്കാൻ ഉത്തരവുണ്ടാകണമെന്നും എൻ.കെ. പ്രേമചന്ദ്രൻ എം.പി ആവശ്യപ്പെട്ടു.