അഞ്ചൽ: ഗ്യാസ് കുറ്റി പൊട്ടിത്തെറിച്ച് വീട് തകർന്ന് വൃദ്ധദമ്പതികൾക്ക് ഗുരുതരമായി പരക്കേറ്റു. പനയഞ്ചേരി ചന്ദ്രോ വിലാസത്തിൽ മനോഹരൻ പിള്ള (65), ലളിത (61) എന്നിവർക്കാണ് പരിക്കേറ്റത്. ഇവരെ അഞ്ചലിലെ സ്വകാര്യ ആശുപത്രിയിലും തുടർന്ന് തിരുവനന്തപുരം മെഡിക്കൽ കോളേജ് ആശുപത്രിയിലും പ്രവേശിപ്പിച്ചു.
ഇന്നലെ വൈകിട്ട് മൂന്നോടെയായിരുന്നു അപകടം. സ്‌ഫോടന ശബ്ദം കേട്ട് നാട്ടുകാർ ഓടിയെത്തിയപ്പോൾ ഇരുവരും ഗുരുതരമായി പരിക്കേറ്റ നിലയിലായിരുന്നു. അഞ്ചൽ പൊലീസും നാട്ടുകാരും ചേർന്നാണ് അടുക്കളയിൽ തകർന്ന സ്ലാബുകൾക്കിടയിൽ കിടന്ന ഇരുവരെയും പുറത്തെടുത്തത്.
സ്‌ഫോടനത്തിൽ വീടിന്റെ മേൽക്കൂര തകർന്നു. ഭിത്തി വീണ്ടുകീറിയ നിലയിലാണ്. വീട്ടുപകരണങ്ങളെല്ലാം നശിച്ചു. ഇവരുടെ ഏക മകൻ മനോജ് ഏതാനും മാസം മുമ്പ് വാഹനാപകടത്തിൽ മരിച്ചിരുന്നു.