കുന്നത്തൂർ: കുന്നത്തൂർ സ്വദേശിയായ സൈനികൻ ജമ്മുകാശ്മീരിൽ ജോലിക്കിടെ അപകടത്തിൽ മരിച്ചു. മാനാമ്പുഴ കോളാറ്റ് വീട്ടിൽ (ഗായത്രി) വിജയൻ കുട്ടിയാണ് (48) മരിച്ചത്. മണ്ണുമാന്തിയന്ത്രം മറിഞ്ഞുണ്ടായ അപകടത്തിലാണ് മരണം. 28 വർഷമായി സൈനിക സേവനം അനുഷ്ഠിക്കുന്ന വിജയൻകുട്ടി കഴിഞ്ഞ ഏപ്രിലാണ് അവസാനമായി നാട്ടിലെത്തിയത്. മഹോർ ഗവ. ആശുപത്രിയിൽ പോസ്റ്റ്മോർട്ടം നടപടികൾ പൂർത്തിയാക്കിയ ശേഷം തിരുവനന്തപുരം വിമാനതാവളത്തിൽ ഇന്നലെ രാത്രിയോടെ എത്തിച്ച മൃതദേഹം സൈനിക അധികൃതർ ഏറ്റുവാങ്ങി പാങ്ങോട് സൈനിക ക്യാമ്പിലേക്ക് മാറ്റി. തിങ്കളാഴ്ച രാവിലെ ജന്മനാട്ടിൽ എത്തിക്കും. പൊതുദർശനത്തിന് ശേഷം പൂർണ സൈനിക ബഹുമതികളോടെ വീട്ടുവളപ്പിൽ സംസ്കരിക്കും. ഭാര്യ: നിഷ. മക്കൾ: രമ്യ വിജയൻ, ഭവ്യ വിജയൻ.