ഒന്നിലും രണ്ടിലും

1 കുട്ടി വീതം

പ്രഥമാദ്ധ്യാപിക നീണ്ട അവധിയിൽ

ആകെ 4 ജീവനക്കാർ

1958ൽ തുടങ്ങി

സ്മാർട്ട് ക്ളാസ് 1

78,452 രൂപ

കോവൂ‌ർ കുഞ്ഞുമോൻ

എം.എൽ.എ അനുവദിച്ചു.

കൊട്ടാരക്കര: പുതിയ അദ്ധ്യയന വർഷം ഒന്നാം ക്ളാസിലേക്ക് എത്തിയത് ഒരാൾ മാത്രം. രണ്ടാം ക്ളാസിലും ഒരേയൊരാൾ. പവിത്രേശ്വരം ഗ്രാമപഞ്ചായത്തിലെ കിഴക്കേ മാറനാട് ഗവ.വെൽഫെയർ എൽ.പി സ്കൂളിലാണ്(മലയിൽ സ്കൂൾ) ഈ ദുർഗതി. ആറര പതിറ്റാണ്ട് പിന്നിട്ട പ്രവർത്തന പാരമ്പ്യമുള്ള സർക്കാർ വിദ്യാലയത്തിന്റെ ഈ ദയനീയാവസ്ഥ അധികൃതരും ജനപ്രതിനിധികളും ഗൗരവത്തിലെടുക്കുന്നില്ല. ഈ നില തുടർന്നാൽ സ്കൂൾ അടച്ചുപൂട്ടലിലേക്ക് നീങ്ങും.

വികസനങ്ങൾക്ക് നേരെ കണ്ണടച്ചു

പവിത്രേശ്വരം ഗ്രാമപഞ്ചായത്തിലെ കിഴക്കേ മാറനാട് ആറാം വാർഡിലാണ് സ്കൂൾ പ്രവർത്തിക്കുന്നത്. 1958ൽ പ്രവർത്തനം തുടങ്ങിയ വിദ്യാലയത്തിന് അന്ന് നിർമ്മിച്ച ഓടിട്ട കെട്ടിടം മാത്രമാണ് ഇപ്പോഴുമുള്ളത്. പകുതിപ്പാറ, നെല്ലിയാംമുകൾ, ഇലഞ്ഞിക്കോട്, പമ്പ് ഹൗസ്, പനയം കോളനികളിലെ പട്ടികജാതി വിഭാഗത്തിൽപ്പെട്ട കുട്ടികൾക്ക് മികച്ച പ്രൈമറി വിദ്യാഭ്യാസം ലഭിക്കുകയെന്ന ലക്ഷ്യംകൂടിയുണ്ടായിരുന്നു സ്കൂൾ തുടങ്ങിയതിന് പിന്നിൽ. കോളനിയിലെ താമസക്കാർ മാത്രമല്ല, നാട്ടിലെ ഒട്ടുമിക്ക കുട്ടികളും 1-ാം ക്ളാസ് മുതൽ 4-ാം ക്ളാസ് വരെ പഠിച്ചത് ഇവിടെയാണ്. ക്ളാസ് മുറികളിൽ ഉൾക്കൊള്ളാൻ കഴിയാത്തത്ര കുട്ടികളുണ്ടായിരുന്നു. എന്നാൽ ഘട്ടം ഘട്ടമായി കൊഴിഞ്ഞുപോക്ക് തുടങ്ങി. ചുറ്റുവട്ടങ്ങളിൽ സ്വകാര്യ സ്കൂളുകൾ സ്കൂൾ ബസ് അടക്കമുള്ള സംവിധാനങ്ങളൊരുക്കി കുട്ടികളെ ആകർഷിച്ചു. പരിമിതികളോട് പടവെട്ടുന്ന സർക്കാർ വെൽഫെയർ സ്കൂൾ വികസനങ്ങൾക്ക് നേരെ കണ്ണടച്ചു. ക്രമേണ കുട്ടികൾ തീരെയില്ലാത്ത അവസ്ഥയിലേക്കെത്തി. പ്രീ പ്രൈമറി വിഭാഗം തുടങ്ങാൻ അധികൃതർ അനുമതി നൽകാത്തതും വിനയായി.

ഓടിക്കളിക്കാൻ മുറ്റമില്ല

15 സെന്റിലാണ് സ്കൂളിന്റെ പ്രവർത്തനം. പതിനെട്ടര സെന്റ് ഭൂമി ഉണ്ടായിരുന്നതായി പറയുന്നു. പഴയ ഓടിട്ട കെട്ടിടമാണുള്ളത്. മഴ പെയ്താൽ ഇതിന്റെ പല കോണുകളിലും ചോർച്ചയുണ്ട്. കൊച്ചുകുട്ടികളാണ് പഠിക്കുന്നത്. അവർക്ക് ഓടിക്കളിക്കാൻ മുറ്റമില്ല. സ്കൂളിന്റെ ചെറിയ വരാന്തയിലാണ് അസംബ്ളി നടത്തുന്നത്. പഴയ കെട്ടിടത്തിലെ ഒരു മുറി കോവൂർ കുഞ്ഞുമോൻ എം.എൽ.എ അനുവദിച്ച 78,452 രൂപ ഉപയോഗിച്ച് സ്മാർട്ട് ക്ളാസ് മുറിയാക്കിയതാണ് ആകെയുള്ള മെച്ചം. നാല് ക്ളാസുകളിലായി ആകെ 10 കുട്ടികളുണ്ട്. പ്രഥമാദ്ധ്യാപിക ഉൾപ്പടെ 4 ജീവനക്കാരാണുള്ളത്. ഇതിൽ പ്രഥമാദ്ധ്യാപിക നീണ്ട അവധിയെടുത്തിരിക്കയാണ്.

സംരക്ഷിക്കണം, നാടൊന്നിക്കണം

ആർ.വിശ്വനാഥൻ, മുൻ പ്രസിഡന്റ്, പവിത്രേശ്വരം ഗ്രാമപഞ്ചായത്ത്

ഈ സർക്കാർ വിദ്യാലയം സംരക്ഷിക്കപ്പെടണം. ഭൗതിക സാഹചര്യങ്ങൾ മെച്ചപ്പെടണം. കൂടുതൽ കുട്ടികളെത്താം തുടർ സഹായ പദ്ധികൾക്കുമായി നാടൊന്നിക്കണം.

കലാ പഠനവും തുടങ്ങണം

എസ്.അനീഷ് കുമാർ, പൊതുപ്രവർത്തകൻ