തിരുവനന്തപുരം: അറിവുള്ള സമൂഹമാണ് രാജ്യത്തിന് ആവശ്യമെന്നും അത്തരം സമൂഹത്തെ വാർത്തെടുക്കാൻ പ്രധാനമന്ത്രിയുടെ മൻ കി ബാത്തിലൂടെ സാധിക്കുന്നുണ്ടെന്നും കേന്ദ്രസഹമന്ത്രി സുരേഷ് ഗോപി പറഞ്ഞു. നെഹ്‌റു യുവകേന്ദ്രയും ഗ്ലോബൽ ഗിവേഴ്സ് ഫൗണ്ടേഷനും സംയുക്തമായി സംഘടിപ്പിച്ച മൻ കി ബാത്ത് ക്വിസ് മത്സരത്തിന്റെ മൂന്നാം സീസൺ പട്ടം സെന്റ് മേരീസ് ഹയർസെക്കൻഡറി സ്കൂളിൽ ഉദ്ഘാടനം ചെയ്യുകയായിരുന്നു അദ്ദേഹം.

ആദരിക്കപ്പെടേണ്ട വ്യക്തികളെയും സംഘത്തേയും മൻ കി ബാത്ത് മുൻനിരയിലേക്ക് ഉയർത്തി. പ്രധാനമന്ത്രിയുടെ റേഡിയോ പ്രഭാഷണം ലോകത്തിന് മാതൃകയായി. അതൊരു രാഷ്ട്രീയ പരിപാടിയെന്ന് എതിരാളികൾപോലും പറയില്ലെന്നും സുരേഷ് ഗോപി പറഞ്ഞു.

വായനാദിനത്തിന്റെ ഭാഗമായി സ്‌കൂളിൽ ഒരുക്കിയിരുന്ന പുസ്തക മതിലും സ്‌കൂളിന്റെ വാർത്താചാനലായ സെന്റ് മേരീസ് ന്യൂസ് ചാനലിന്റെ (എസ്.എം ന്യൂസ്) സംപ്രേഷണവും അദ്ദേഹം ഉദ്ഘാടനം ചെയ്തു.

സമൂഹത്തിൽ സേവനസന്നദ്ധതയോടെ ഇടപെടുന്ന അനവധിപേരെ മൻ കി ബാത്തിലൂടെ രാജ്യം തിരിച്ചറിഞ്ഞെന്ന് മുഖ്യപ്രഭാഷണം നടത്തിയ മുൻ കേന്ദ്രമന്ത്രി വി.മുരളീധരൻ പറഞ്ഞു. കർദ്ദിനാൾ മാർ ബസേലിയോസ് ക്ലീമിസ് കാതോലിക്കാ ബാവ ചടങ്ങിൽ അദ്ധ്യക്ഷത വഹിച്ചു. നെഹ്‌റു യുവകേന്ദ്ര സംസ്ഥാന ഡയറക്ടർ എം.അനിൽകുമാർ, പ്രിൻസിപ്പൽ ഫാ. നെൽസൺ, കേരള നോളജ് ഇക്കോണമി മിഷൻ ഡയറക്ടർ ഡോ. പി.എസ്.ശ്രീകല തുടങ്ങിയവർ പങ്കെടുത്തു.