കടയ്ക്കാവൂർ: കടയ്ക്കാവൂർ ഗ്യാസ് ഏജൻസി - റെയിൽവേ സ്റ്റേഷൻ റോഡ് തകർന്ന് ഗതാഗതം ദുസഹമായിട്ട് വർഷങ്ങളായി. കടയ്ക്കാവൂർ ഗ്രാമപഞ്ചായത്ത് പത്താം വാർഡിലെ ഗ്യാസ് ഏജൻസി- റെയിൽവേ സ്റ്റേഷൻ റോഡാണ് തകർന്ന് തരിപ്പണമായിക്കിടക്കുന്നത്.

കടയ്ക്കാവൂർ -വക്കം- അഞ്ചുതെങ്ങ് ഗ്രാമപഞ്ചായത്തുകളിൽ നിന്നുള്ള വിദ്യാർത്ഥികളും സ്ത്രീകളും കുട്ടികളും അടക്കമുള്ളവർ തിരുവനന്തപുരത്തും കൊല്ലത്തേക്കും പോകുവാനായി കടയ്ക്കാവൂർ റെയിൽവേ സ്റ്റേഷനെയാണ് ആശ്രയിക്കുന്നത്. ഇവരിൽ നല്ലൊരു പങ്കും ഈ വഴിയാണ് ഉപയോഗിക്കുന്നത്. സ്കൂൾ ബസുകളും ഗ്യാസ് ഏജൻസിയിലെ മറ്റ് വാഹനങ്ങളുമായി എപ്പോഴും തിരക്കേറിയ റോഡാണിത്. ഇരുചക്ര വാഹനങ്ങളിലും മറ്റു കടന്നുപോകുന്ന യാത്രക്കാർക്ക് സഞ്ചാരയോഗ്യമല്ലാത്ത ഈറോഡ് അപകടക്കെണിയായി മാറിയിരിക്കുകയാണ്. ഇരുചക്രവാഹനങ്ങൾ മറിഞ്ഞിവീഴുന്നത് നിത്യ സംഭവമാണ്. 10 വർഷം മുൻപാണ് അവസാനമായി ഈ റോഡ് ടാർ ചെയ്തത്. അന്നത്തെ ടാറിങ്ങിന്റെ നിലവാരക്കുറവ് മൂലം വളരെ പെട്ടെന്ന് തന്നെ റോഡിൽ കുണ്ടും കുഴിയും രൂപപ്പെടാൻ തുടങ്ങിയിരുന്നതായി നാട്ടുകാർ പറയുന്നത്. മഴക്കാലമായതോടെ ഇതിന്റെ വ്യാപ്തി വർധിച്ചു. റോഡിന്റെ നവീകരണ പ്രവർത്തികൾ ആവശ്യപ്പെട്ടുകൊണ്ട് പ്രദേശവാസികൾ നിരവധി തവണ ഗ്രാമപഞ്ചായത്ത് അധികൃതരെ സമീപിച്ചെങ്കിലും ഫലം ഉണ്ടായില്ല. എത്രയും പെട്ടെന്ന് ഈ റോഡ് നവീകരിച്ച് സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം.