കുട്ടനാട്: തോളോടുതോൾ ചേർന്ന് പഞ്ചായത്ത് ഭരണം നടത്തുന്ന സി.പി.എമ്മും കോൺഗ്രസും രാമങ്കരി പഞ്ചായത്ത് 13ാം വാർഡ് ഉപതിരഞ്ഞെടുപ്പിൽ പരസ്‌പരം ഏറ്റുമുട്ടാനൊരുങ്ങിയതോടെ നാട്ടിൽ പ്രധാന ചർച്ചാവിഷയമായി. വീണ്ടുമൊരു ഏറ്റുമുട്ടലിന് തയ്യാറെടുത്ത് ഇരുപക്ഷവും ഗോദയിലിറങ്ങിയതോടെ ബി.ജെ.പി,​ എസ്.യു.സി.ഐ സ്ഥാനാർത്ഥികൾ പ്രചരണം ശക്തമാക്കി. ഇതോടെ വിജയം പ്രവാചനാതീതമാകുകയും അടിയൊഴുക്കുകൾ ശക്തമാകുകയും ചെയ്തു. നാമനിർദ്ദേശ പത്രിക പിൻവലിക്കാനുള്ള സമയം ഇന്നലെ വൈകിട്ടോടെ അവസാനിച്ചതോടെയാണ് കളം തെളിഞ്ഞത്.

വാർഡിന്റെ തിരഞ്ഞെടുപ്പ് ചരിത്രത്തിൽ കഴിഞ്ഞ പ്രാവശ്യത്തേതിന് തൊട്ടുമുമ്പത്തേത്

ഒഴികെ എല്ലാത്തിലും വിജയം നേടിയ സി.പി.എം,​ ഇത്തവണ ചരിത്രം ആവർത്തിക്കാമെന്ന കണക്കുകൂട്ടലിലാണ്. പഞ്ചായത്തിൽ സി.പി.എം പിന്തുണയോടെയാണ് ഭരണമെങ്കിലും തിരഞ്ഞെടുപ്പിൽ ഒരുവിട്ടുവീഴ്ചയ്ക്കും തയ്യാറല്ലെന്ന് യു.ഡി.എഫും വ്യക്തമാക്കിയതോടെ,​ ഇരുമുന്നണികളുടെയും കണക്കുകൂട്ടലുകളെല്ലാം തെറ്റിച്ചുകൊണ്ട് പുതുചരിത്രം കുറിക്കാനാകുമെന്ന പ്രതിക്ഷയിലാണ് കന്നിമത്സരത്തിനിറങ്ങിയ ബി.ജെ.പി, എസ്.യു.സി.ഐ സ്ഥാനാർത്ഥികൾ.