ആലപ്പുഴ: സ്‌കൂളുകളിൽ പാചകത്തിനും കുടിക്കാനും ഉപയോഗിക്കുന്ന വെള്ളം ശുദ്ധീകരിച്ചതാകണമെന്ന് സംസ്ഥാന ബാലാവകാശ കമ്മീഷനംഗം അഡ്വ.ജലജ ചന്ദ്രൻ പറഞ്ഞു. കുട്ടികൾ ഭക്ഷ്യവിഷബാധയെ തുടർന്ന് ആശുപത്രിയിൽ ചികിത്സ തേടിയ ആര്യാട് ലൂഥറൻസ് ഹൈസ്‌കൂളിൽ അന്വേഷണത്തിന് എത്തിയതായിരുന്നു കമ്മീഷൻ. കുട്ടികൾക്ക് നൽകുന്ന ഭക്ഷണത്തിന്റെയും വെള്ളത്തിന്റെയും സാമ്പിൾ ഓരോ ദിവസവും ശേഖരിച്ച് വയ്ക്കണമെന്നും കമ്മീഷൻ പറഞ്ഞു.ജില്ല ശിശുസംരക്ഷണ ഓഫീസർ ടി.വി.മിനിമോൾ, ഔട്ട് റീച്ച വർക്കർ നിഖിൽ വർഗീസ് എന്നിവർക്കൊപ്പമാണ് കമ്മീഷനംഗം സ്‌കൂളിലെത്തിയത്.