അമ്പലപ്പുഴ: കരുമാടി ഗവ. ആയുർവേദ ആശുപത്രിക്ക് 5 കോടി രൂപയുടെ പുതിയ കെട്ടിടം നിർമ്മിക്കുമെന്ന് എച്ച്. സലാം എം .എൽ എ പറഞ്ഞു. കെട്ടിടത്തിന്റെ ടെണ്ടർ നടപടികൾ പൂർത്തിയാക്കി. ഗ്രാമീണാന്തരീക്ഷത്തിൽ ആയുർവ്വേദത്തിൽ മികച്ച ചികിത്സ ലഭ്യമാക്കുക എന്ന ലക്ഷ്യം മുൻനിർത്തിയാണ്, ഗാന്ധിജി അന്തിയുറങ്ങിയ മുസാവരി ബംഗ്ലാവിനോട് ചേർന്ന ആശുപത്രി അങ്കണത്തിൽ പുതിയ ബ്ലോക്ക് നിർമ്മിക്കുന്നത്. അഞ്ചു നിലകളിലായി പൂർത്തിയാക്കുന്ന കെട്ടിടത്തിലെ ഗ്രൗണ്ട് ഫ്ലോറിൽ ഒ .പി ബ്ലോക്ക്, മൈനർ ഓപ്പറേഷൻ തീയറ്റർ, വിവിധ തരം സ്പെഷ്യാലിറ്റി കൺസൾട്ടേഷൻ, സ്പോർട്സ് മെഡിസിൻ എന്നിവയുണ്ടാകും. ഒന്നാം നിലയിൽ 15 കിടക്ക സൗകര്യങ്ങളോടുകൂടിയ സ്ത്രീകളുടെ വാർഡ്, പഞ്ചകർമ്മ തെറാപ്പി മുറി, വിശ്രമമുറി, നഴ്സിംഗ് സ്റ്റേഷൻ എന്നിവയും, രണ്ടാംനിലയിൽ പുരുഷന്മാർക്കുള്ള വാർഡും പ്രവർത്തിക്കും.

നിലകൾ : 5

പേവാർഡ് സൗകര്യം

 മൂന്നാം നിലയിൽ പേ വാർഡ്, ഡ്യൂട്ടി മുറി, കോൺഫറൻസ് ഹാൾ

 റീഹാബിലിറ്റേഷൻ, ഫിസിയോതെറാപ്പി സെന്ററുകൾ ഉണ്ടാകും

 ഗ്രാമീണാന്തരീക്ഷത്തിൽ മികച്ച ചികിത്സ ലഭ്യമാക്കുക ലക്ഷ്യം

ടെൻഡർ നടപടി പൂർത്തീകരിച്ച കെട്ടിടത്തിന്റെ നിർമ്മാണം ആഗസ്റ്റിൽ ആരംഭിക്കും. ഊരാളുങ്കൽ ലേബർ കോൺട്രാക്ട് സൊസൈറ്റിക്കാണ് നിർമ്മാണച്ചുമതല

- എച്ച്.സലാം എം.എൽ.എ