ന്യൂഡൽഹി : സുപ്രീംകോടതി വിധിയുടെ അടിസ്ഥാനത്തിൽ നീറ്റ് യു.ജി പരീക്ഷാഫലം ഇന്നലെ പുതുക്കി പ്രസിദ്ധീകരിച്ചപ്പോൾ മലയാളിയായ ശ്രീനന്ദ് ഷർമിളിനുൾപ്പെടെ 17പേർക്ക് ഒന്നാം റാങ്ക്. കണ്ണൂർ സ്വദേശിയാണ്. 720ൽ 720ഉം ശ്രീനന്ദ് നേടി.

ആദ്യത്തെ വിവാദ റാങ്ക് ലിസ്റ്റിൽ 67 പേർക്കായിരുന്നു ഒന്നാം റാങ്ക്. അതാണ് ഇപ്പോൾ 17 ആയി ചുരുങ്ങിയത്.

കേരളത്തിൽ നിന്ന് ദേവദർശൻ ആർ. നായർ, അഭിഷേക് വി.ജെ, അഭിനവ് സുനിൽ പ്രസാദ് എന്നിവർ മൂന്നാം റാങ്ക് കരസ്ഥമാക്കി. (715 മാർക്ക്).

കേരളത്തിലെ 86,713 പേർ മെഡിക്കൽ പ്രവേശനത്തിന് യോഗ്യത നേടി. പുതുക്കിയ ഫലവും സ്കോർ കാർഡും https://neet.ntaonline.in/frontend/web/re-revised25july-scorecard/score-card ലഭ്യമാണ്.

4 ലക്ഷം പേർക്ക്

മാർക്ക് കുറഞ്ഞു

ഫിസിക്‌സിലെ 19-ാമത്തെ ചോദ്യത്തിന് ഓപ്ഷൻ നമ്പ‌ർ നാലാണ് ശരിയുത്തരമായി എടുക്കേണ്ടതെന്ന് സുപ്രീംകോടതി നിർദ്ദേശിച്ചിരുന്നു. അതനുസരിച്ചാണ് പരീക്ഷാഫലം പുതുക്കിയത്. എന്നാൽ, പഴയ സിലബസ് പ്രകാരം ശരിയുത്തരം ഓപ്ഷൻ നമ്പർ രണ്ടാണ്. ഇത് രേഖപ്പെടുത്തിയവർക്ക് നേരത്തെ ഗ്രേസ് മാർക്ക് നൽകിയിരുന്നു. കോടതി വിധിയോടെ, ഇവർക്ക് അഞ്ച് മാർക്കാണ് കുറഞ്ഞത്. നാല് ലക്ഷത്തിലധികം പേർക്ക് മാർക്കിൽ മാറ്റമുണ്ടായെന്നാണ് സൂചന.