കോലഞ്ചേരി: എംപറർ ഇമ്മാനുവൽ ചർച്ചിനെതിരെ യൂട്യൂബ്, ഫേസ്ബുക്ക് എന്നിവയിലൂടെ വ്യാജവാർത്തകൾ പ്രചരിപ്പിച്ച് കലാപത്തിന് ശ്രമിച്ച പാലക്കാട് പുതുശേരി ഈസ്റ്റ് വില്ലേജ് വീരകൊല്ലൂർ ബനഡിക്ടിനെ (ബെൻ ജോൺസൺ -34) പുത്തൻകുരിശ് ഡിവൈ.എസ്.പി വി.എ. നിഷാദ് മോന്റെ നേതൃത്വത്തിലുള്ള പൊലീസ്‌സംഘം അറസ്റ്റുചെയ്തു. മതസ്പർദ്ധയും കലാപവും ലക്ഷ്യമിട്ടുള്ള വ്യാജവാർത്തകൾ ചർച്ചിന്റെ ലോഗോകളും ചിഹ്നങ്ങളും ദുരുപയോഗം ചെയ്ത് പ്രചരിപ്പിക്കുകയായിരുന്നു. ഇതേ തുടർന്ന് ചില അനിഷ്ടസംഭവങ്ങളും റിപ്പോർട്ടു ചെയ്തിരുന്നു. പുത്തൻകുരിശ് പൊലീസ് രജിസ്​റ്റർ ചെയ്ത കേസിലെ ഒന്നാം പ്രതിയാണ് ഇയാൾ. എംപറർ ഇമ്മാനുവൽ ചർച്ച് ട്രസ്​റ്റി നൽകിയ പരാതിയിലാണ് അറസ്റ്റ്. കോലഞ്ചേരി ജുഡിഷ്യൽ ഫസ്​റ്റ് ക്ലാസ്സ് മജിസ്‌ട്രേട്ട് മുമ്പാകെ ഹാജരാക്കി റിമാൻഡ് ചെയ്തു.