കോലഞ്ചേരി: നിങ്ങൾ പെൻഷൻ വാങ്ങുന്നവരാണോ ? അക്ഷയ വഴി ലൈഫ് സർട്ടിഫിക്ക​റ്റ് കൈപ്പ​റ്റുക. അല്ലെങ്കിൽ പെൻഷൻ മുടങ്ങും. തദ്ദേശ സ്ഥാപനങ്ങൾ വഴി നൽകുന്ന സാമൂഹ്യ സുരക്ഷാ പെൻഷനുകളായ വാർദ്ധക്യകാല പെൻഷൻ, കർഷക തൊഴിലാളി പെൻഷൻ, വിധവാ പെൻഷൻ , വികലാംഗ പെൻഷൻ, 50 വയസിന് മുകളിലുള്ള അവിവാഹിത പെൻഷൻ എന്നിവ വാങ്ങുന്നവരും കൂടാതെ ക്ഷേമനിധി ബോർഡിൽ നിന്ന് പെൻഷൻ വാങ്ങുന്നവരും മസ്​റ്ററിംഗ് നടത്തി ലൈഫ് സർട്ടിഫിക്ക​റ്റ് കൈപ്പ​റ്റണം.

 മസ്​റ്ററിംഗ്

പെൻഷൻ ലഭിക്കുന്നവരെല്ലാം ജീവിച്ചിരുപ്പുണ്ടെന്ന് സാക്ഷ്യപെടുത്തുന്നതിന് വേണ്ടിയാണ് മസ്​റ്ററിംഗ്. ഏതെങ്കിലും അക്ഷയ കേന്ദ്രത്തിൽ നേരിട്ട് പോയി വിരലടയാളം വഴിയോ കണ്ണോ ഉപയോഗിക്കാം. ആധാർ കാർഡും പെൻഷൻ ഐ.ഡിയും കൈയിൽ കരുതണം. വിധവാ പെൻഷൻ, അവിവാഹിത പെൻഷൻ എന്നിവ വാങ്ങുന്ന 60 വയസിന് താഴെയുള്ളവർ പുനർവിവാഹിതരായിട്ടില്ലെന്ന സർട്ടിഫിക്ക​റ്റ് കൂടി ഹാജരാക്കണം

 ലൈഫ് സർട്ടിഫിക്ക​റ്റ്

പെൻഷൻ വാങ്ങുന്ന വ്യക്തി നേരിട്ട് അക്ഷയയിലെത്തി വേണം മസ്​റ്ററിംഗ് നടത്താൻ. പെൻഷൻ വാങ്ങുന്നതിനായി തദ്ദേശസ്ഥാപനത്തിൽ സമർപ്പിച്ച ആധാറിലുള്ള വിരലടയാളവും മസ്​റ്ററിംഗ് നടത്തുന്ന സമയത്തെ വിരലടയാളവും ഒന്നായാൽ മാത്രമേ മസ്​റ്ററിംഗ് മുഖേനെ ലൈഫ് സർട്ടിഫിക്ക​റ്റ് ലഭിക്കുകയുള്ളൂ. നിലവിലെ സർക്കാർ ഉത്തരവ് പ്രകാരം ഓഗസ്റ്റ് 24 വരെ മസ്റ്ററിംഗ് നടത്താം.

2024 ജനുവരി ഒന്ന് മുതൽ സാമൂഹ്യ സുരക്ഷാ ക്ഷേമ പെൻഷനു വേണ്ടി അപേക്ഷ സമർപ്പിച്ചവർ നിലവിൽ മസ്​റ്ററിംഗ് നടത്തേണ്ടതില്ല. കിടപ്പ് രോഗികൾക്ക് വീടുകളിലെത്തി മസ്​റ്ററിംഗ് പൂർത്തീകരിക്കുന്നതിനായി അതത് തദ്ദേശ ഭരണ കൗൺസിലർ മുമ്പാകെ അപേക്ഷ സമർപ്പിക്കണം.

നിരക്ക്

അക്ഷയ കേന്ദ്രങ്ങളിൽ 30 രൂപ

ഹോം മസ്​റ്ററിംഗിന് 50 രൂപ

 പെൻഷൻ മസ്​റ്ററിംഗ് പൂർത്തീകരിക്കുന്നതിന് അക്ഷയ കേന്ദ്രങ്ങളെ മാത്രമാണ് ചുമതല.