ആലുവ: ആലുവയുടെ സാംസ്‌കാരിക രംഗത്തെ ആദ്യകാല സ്ഥാപനമായ ആലുവ സംഗീത സഭ (ടാസ്) എഴുപതാം വയസിലേക്ക് പ്രവേശിക്കുന്നു. നഗരമദ്ധ്യത്തിൽ 23 സെന്റ് സ്ഥലത്ത് സാംസ്‌കാരിക പരിപാടികൾ അവതരിപ്പിക്കുന്നതിനായി സ്ഥാപിച്ച ടാസ് 1954 സെപ്തംബർ 18ന് തിരുകൊച്ചി രാജപ്രമുഖനായിരുന്ന ശ്രീചിത്തിരത്തിരുന്നാൾ ബാലരാമവർമ്മയാണ് ഉദ്ഘാടനം ചെയ്തത്.
ആദ്യകാലങ്ങളിൽ സാംസ്‌കാരിക, വിവാഹ പരിപാടികൾക്ക് വാടകയ്ക്ക് ലഭിച്ചിക്കുന്നത് ടാസ് ഹാൾ മാത്രമായിരുന്നു. ടാസ് ഹാൾ കേന്ദ്രീകരിച്ച് കഥകളി ആസ്വാദക ക്ലബും നാടകാസ്വാദക ക്ലബും ഇപ്പോഴുമുണ്ട്.
പരിപാടികൾക്ക് ശേഷം ആളുകൾക്ക് പോകാൻ ടാസ് ഹാൾ പരിസരത്ത് നിന്ന് പ്രത്യേക ബസ് സർവീസുകൾ അങ്കമാലി, പെരുമ്പാവൂർ മേഖലയിലേക്ക് നടത്തുമായിരുന്നു.
കേരള സാഹിത്യ അക്കാദമിയുടെ അംഗീകാരവും ടാസിനുണ്ട്‌.
നൃത്തം, മൃദംഗം, വായ് പാട്ട്, വയലിൻ ഇനങ്ങളിലായി മുന്നൂറിലേറെ വിദ്യാർത്ഥികൾ ഇവിടെ പഠനം നടത്തുന്നു.
നാടക സംഘങ്ങൾക്ക് റിഹേഴ്‌സലിനും സാംസ്‌കാരിക സംഘടനകൾക്കും മറ്റും സാംസ്‌കാരിക പരിപാടികൾ സംഘടിപ്പിക്കാനും ആയിരം പേർക്ക് വരെ ഇരിക്കാവുന്ന ഹാൾ കുറഞ്ഞ നിരക്കിൽ വാടകക്ക് നൽകുന്നുണ്ട്.
എല്ലാ വർഷവും നാടകമേള, സ്വാതിതിരുന്നാൾ സംഗീതോത്സവം, കഥകളി, മൃദംഗ മത്സരം സാഹിത്യമത്സരങ്ങൾ എന്നിവ സംഘടിപ്പിക്കാറുണ്ട്.
എഴുപതാം വാർഷികം പ്രമാണിച്ച് ടാസ് ഹാൾ നവീകരിക്കാനാണ് തീരുമാനം. കേന്ദ്ര, സംസ്ഥാന സർക്കാരുകളുടെയും വ്യക്തികളുടെയും സഹായം തേടും. സെപ്തംബറിൽ അഞ്ച് ദിവസം നീളുന്ന വാർഷികാഘോഷവും സംഘടിപ്പിക്കും.