കോതമംഗലം: മുനിസിപ്പൽ ബസ് സ്റ്റാൻഡിന് മുന്നിൽ തടി കയറ്റിവന്ന ലോറി മറിഞ്ഞു. ആലുവ-മൂന്നാർ റോഡിലാണ് അപകടം നടന്നത്. ആർക്കും പരിക്കേറ്റില്ല. ഇന്നലെ രാവിലെ ആറ് മണിയോട് കൂടി ഹൈറേഞ്ച് ഭാഗത്തുനിന്ന് യൂക്കാലി തടി കയറ്റിവന്ന വലിയ ലോറിയാണ് മറിഞ്ഞത്. അപകടത്തെ തുടർന്ന് പാതയിൽ ഗതാഗതം തടസപ്പെട്ടു. ഫയർഫോഴ്സും പൊലീസും സംഭവസ്ഥലത്തെത്തി ഗതാഗതം നിയന്ത്രിച്ചു. ക്രെയിൻ ഉപയോഗിച്ചാണ് വാഹനം മാറ്റിയത്. ആറ് മണിക്കൂറിന് ശേഷമാണ് ഗതാഗതം പൂർവസ്ഥിതിയിലായത്.