മട്ടാഞ്ചേരി: നിയന്ത്രണംവിട്ട സ്വകാര്യബസ് രണ്ടു വീടുകളുടെ ഗേറ്റും മതിലും തകർത്ത് മറ്റൊരു ബസിൽ ഇടിച്ചുകയറി. ഫോർട്ട് കൊച്ചി വെളി മാന്ത്ര പാലത്തിനുസമീപം ഇന്നലെ ഉച്ചയ്ക്ക് 2.30നായിരുന്നു അപകടം. 15ഓളം പേർക്ക് പരിക്കേറ്റു.

ഫോർട്ട് കൊച്ചിയിൽ നിന്ന് ഇടക്കൊച്ചിയിലേക്ക് പോയ അലീന ബസും പുക്കാട്ടുപടിയിൽ നിന്ന് ഫോർട്ട് കൊച്ചിയിലേക്ക് വന്ന സിംസാര ബസുമാണ് കൂട്ടിയിടിച്ചത്. നിയന്ത്രണംവിട്ട സിംസാര ബസ് ഒരുവീടിന്റെ ഗേറ്റും മറ്റൊരു വീടിന്റെ മതിലും വൈദ്യുതി പോസ്റ്റും തകർത്തശേഷമാണ് അലീന ബസിൽ ഇടിച്ചത്.
ഇരു ബസുകളുടെയും മുൻവശം തകർന്നു. ഫോർട്ട് കൊച്ചി, മട്ടാഞ്ചേരി സ്വദേശികളായ ഷൈമ (17), നസീമ (60), ശ്രീകല (59), ഫിർസാന (18), വൈശാഖ് (23), യമുന (70), ഉമാദേവി (60), ഗായത്രി (20), ഷംല (46) എന്നിവർ ഫോർട്ട് കൊച്ചി സർക്കാർ ആശുപത്രിയിലും മിർഷ (18) മട്ടാഞ്ചേരി സംഗീത് ആശുപത്രിയിലും അലീന ബസിലെ ഡ്രൈവർ സാജു പീറ്റർ, കണ്ടക്ടർ സുരേഷ് എന്നിവർ കരുവേലിപ്പടി സർക്കാർ ആശുപത്രിയിലും ചികിത്സ തേടി. നിസാര പരിക്കേറ്റവർ പ്രാഥമിക ചികിത്സയ്ക്കുശേഷം വീട്ടിലേക്ക് മടങ്ങി. ഫോർട്ട് കൊച്ചി പൊലീസ് കേസെടുത്തു.