കോതമംഗലം: ഇന്നലെയുണ്ടായ ശക്തമായ മഴയിലും കാറ്റിലും പിണ്ടിമന പഞ്ചായത്തിലെ വേട്ടമ്പാറയിൽ മരം കടപുഴകി വീടുകൾ തകർന്നു. ഒന്നാം വാർഡായ വേട്ടാമ്പാറയിൽ താണിവീട്ടിൽ സാലി വർഗീസിന്റെ വീടിന്റെ മുകളിലേക്ക് കൂറ്റൻ തേക്കുമരമാണ് കടപുഴകി വീണത്. ടെറസിൽ ചെയ്തിരുന്ന റൂഫിംഗ് പൂർണമായും സൺഷെഡ് ഭാഗികമായും തകർന്നു. വീട്ടുടമ സാലി വർഗീസ് പള്ളിയിൽ പോയ സമയത്താണ് മരം വീണത്. മറ്റാരും വീട്ടിലുണ്ടായിരുന്നില്ല. വൈദ്യുതി പോസ്റ്റും ഒടിഞ്ഞു വീണു.വീടിന്റെ സംരക്ഷണ മതിലിനും കേടുപാടുകൾ സംഭവിച്ചിട്ടുണ്ട്. സമീപത്തുള്ള മരച്ചേരി എംപി ഔസേപ്പിന്റെ വീട്ടിലേക്ക് വാകമരമാണ് ഒടിഞ്ഞു വീണത്. വീടിനോട് ചേർന്നുള്ള തണ്ടികയ്ക്ക് കാര്യമായ കേടുപാടുകൾ സംഭവിച്ചിട്ടുണ്ട്. വീടുകൾക്ക് കാര്യമായ നാശനഷ്ടം ഉണ്ടായിട്ടുണ്ടെന്നും നഷ്ടപരിഹാരം നൽകാനുള്ള നടപടി സ്വീകരിക്കുമെന്നും പിണ്ടിമന ഗ്രാമപഞ്ചായത്ത് പ്രസിഡന്റ് ജെസി സാജു പറഞ്ഞു.