മൂവാറ്റുപുഴ: കോൺഗ്രസ് നേതാവും മുൻ മൂവാറ്റുപുഴ നഗരസഭ ചെയർമാനുമായിരുന്ന അന്തരിച്ച അഡ്വ. കെ.ആർ. സദാശിവൻ നായരുടെ സ്മരണാർത്ഥം കുര്യൻമലയിൽ നിർമ്മിക്കുന്ന മിനി സ്റ്റേഡിയത്തിന്റെ ശിലാസ്ഥാപനം ഡീൻ കുര്യാക്കോസ് എം.പി നിർവഹിച്ചു. നഗരസഭ ചെയർമാൻ പി.പി. എൽദോസ് അദ്ധ്യക്ഷനായി. എം.എൽ.എമാരായ മാത്യു കുഴൽനാടൻ, എൽദോസ് കുന്നപ്പിള്ളി, നഗരസഭ വൈസ് ചെയർപേഴ്സൺ സിനി ബിജു, സ്റ്റാൻഡിംഗ് കമ്മിറ്റി ചെയർമാന്മാരായ അജി മുണ്ടട്ട്, ജോസ് കുര്യാക്കോസ്, നിസ അഷ്‌റഫ്‌, അബ്ദുൽ സലാം, കൗൺസിലർമാരായ കെ.ജി. അനിൽകുമാർ, ജോയ്‌സ് മേരി, ജാഫർ സാദിഖ്, പി.എം. സലിം, ജോളി മണ്ണൂർ, കോൺഗ്രസ് നേതാവ് അഡ്വ. വർഗീസ് മാത്യു, പി.എം. ഏലിയാസ്, സോജൻ പിട്ടാപ്പിള്ളി, സി.ഡി.എസ്. ചെയർപേഴ്സൺ പി.പി. നിഷ, സന്ധ്യ സാദാശിവൻ നായർ തുടങ്ങിയവർ പ്രസംഗിച്ചു.

85 സെന്റ് സ്ഥലത്ത് നിർമിക്കുന്ന സ്റ്റേഡിയത്തോനുബന്ധിച്ച് ടർഫ്, മഡ് കോർട്ട്, ഗാലറി, ഓഫീസ്, വിശ്രമ മുറികൾ തുടങ്ങിയ ആധുനിക സൗകര്യങ്ങളുണ്ടാകും. ഗ്രാമത്തിൽ ഒരു കളിസ്ഥലം പദ്ധതിയിൽ ഉൾപ്പെടുത്തി നടപ്പാക്കുന്ന മിനി സ്റ്റേഡിയത്തിന്റെ നിർമ്മാണ ചുമതല സ്പോർട്സ് കേരള ഫൗണ്ടേഷനാണ്. ആകെ 70 ലക്ഷം രൂപ ചെലവ് പ്രതീക്ഷിക്കുന്നതിൽ 35 ലക്ഷം രൂപ കേരള സർക്കാരിൽ നിന്നും 10 ലക്ഷം രൂപ വീതം നഗരസഭ, എം.പി. ഫണ്ട് എന്നിവയിൽ നിന്നും 15 ലക്ഷം രൂപ എം.എൽ.എ ഫണ്ടിൽ നിന്നുമാണ് വകയിരുത്തിയിട്ടുള്ളത്.