മൂവാറ്റുപുഴ: 'ജലം ജീവനാണ്" എന്ന മുദ്രാവാക്യമുയർത്തി വിദ്യാർത്ഥികളുടെ നേതൃത്വത്തിലുള്ള മൂവാറ്റുപുഴയാർ നദി സംരക്ഷണ പരിപാടികൾക്ക് ത്രിവേണി സംഗമത്തിൽ തുടക്കമായി. പായിപ്ര ഗവ. യു.പി സ്കൂളിലെ സോഷ്യൽ സർവീസ് സ്കീമിന്റെയും മൂവാറ്റുപുഴ സീ പാസ് ടീച്ചർ ട്രെയിനിംഗ് കോളേജ് എൻ.എസ്.എസ് യൂണിറ്റിന്റെയും ആഭിമുഖ്യത്തിൽ പ്രമുഖ പരിസ്ഥിതി സംഘടനയായ ഗ്രീൻ പീപ്പിൾ ആണ് പ്രചരണപരിപാടി സംഘടിപ്പിച്ചത്. മൂവാറ്റുപുഴയാറിന്റെ തീരത്ത് ഒത്തുചേർന്ന കുട്ടികൾക്ക് ജല സംരക്ഷണ പ്രതിജ്ഞ ചൊല്ലികൊടുത്ത് മൂവാറ്റുപുഴ ആർ.ഡി.ഒ ഷൈജു പി.ജേക്കബ്ബ് പരിപാടി ഉദ്ഘാടനം ചെയ്തു. തുടർന്ന് കുട്ടികൾ മൂവാറ്റുപുഴയാറിന്റെ സമീപത്തെ പ്ലാസ്റ്റിക് മാലിന്യങ്ങൾ നീക്കം ചെയ്തു. പുഴ കയ്യേറ്റങ്ങൾക്കെതിരെ പ്രതീകാത്മകമായി കുട്ടികൾ നദിയിൽ കളിവഞ്ചികൾ ഒഴുക്കി. ഗ്രീൻ പീപ്പിൾ കോർഡിനേറ്റർമാരായ അസീസ് കുന്നപ്പിള്ളി, ഷാജി കെ.എസ് , സിജു വളവിൽ, സോഷ്യൽ സർവീസ് സ്കീം കോഡിനേറ്റർ കെ.എം നൗഫൽ, പ്രിൻസിപ്പൽ ഡോ. ജയശ്രീ പി.ജി, പി.ടി.എ പ്രസിഡന്റ് നിസാർ മീരാൻ, പൗസി വി.എ,​ അജ്മി ഇബ്രാഹിം, നിഥിന കൃഷ്ണൻകുട്ടി, അമ്പിളി എം.സി. തുടങ്ങിയവർ സംസാരിച്ചു.