കൊച്ചി: അങ്കമാലി അയ്യമ്പുഴയിൽ 400 ഏക്കറിൽ നടപ്പാക്കുന്ന ഗ്ളോബൽസിറ്റി പദ്ധതിക്ക് പുനരംഗീകാരം നൽകണമെന്ന് ബെന്നി ബഹനാൻ എം.പിയും റോജി എം. ജോൺ എം.എൽ.എയും കേന്ദ്ര വാണിജ്യ, വ്യവസായമന്ത്രി പീയൂഷ് ഗോയലിന് നൽകിയ നിവേദനത്തിൽ ആവശ്യപ്പെട്ടു.

2020 ആഗസ്റ്റ് 19ന് പദ്ധതിക്ക് കേന്ദ്രസർക്കാരിന്റെ അംഗീകാരം ലഭിച്ചിരുന്നെങ്കിലും ഭൂമി ഏറ്റെടുക്കൽ വൈകിയതോടെ നഷ്ടമായി. ഭൂമി ഏറ്റെടുക്കൽ സംസ്ഥാന സർക്കാർ പൂർത്തീകരിച്ചു. കേരളത്തിന്റെ സമ്പദ്‌വ്യവസ്ഥയുടെ വളർച്ച, തൊഴിൽ അവസരങ്ങൾ, അടിസ്ഥാനസൗകര്യ വികസനം എന്നിവയ്ക്ക് പദ്ധതി വലിയ സാദ്ധ്യതകളുള്ള പദ്ധതിക്ക് കേന്ദ്രഅംഗീകാരം വേഗത്തിൽ ലഭ്യമാക്കണമെന്ന് എം.പിയും എം.എൽ.എയും സംയുക്തമായി നൽകിയ നിവേദനത്തിൽ ആവശ്യപ്പെട്ടു.

വാണിജ്യമേഖലയിൽ കുതിച്ചുചാട്ടത്തിന് വഴിവയ്ക്കുന്ന പദ്ധതി അന്താരാഷ്ട്ര നിലവാരത്തിൽ താമസ, വാണിജ്യ, വ്യവസായ മേഖലകൾ അടങ്ങിയ ടൗൺഷിപ്പ് ഉൾപ്പെടുന്നതാണ്. ആരോഗ്യ, വിദ്യാഭ്യാസ സ്ഥാപനങ്ങൾക്കും പ്രത്യേക സ്ഥലങ്ങളുണ്ടാകും.