വൈപ്പിൻ: നിയമപ്രകാരമുള്ള വലിപ്പം ഇല്ലാത്ത 1500 കിലോ അയല മത്സ്യവുമായി മഹിമ എന്ന ഫൈബർ വള്ളം പിടിയിലായി. വൈപ്പിൻ ഫിഷറീസ് സ്റ്റേഷനിലെ ഫിഷറീസ് മറൈൻ എൻഫോഴ്‌സ്‌മെന്റ് ടീമിന്റെ പരിശോധനയിലാണ് വള്ളം പിടിയിലായത്. ചെല്ലാനം ഹാർബർ കേന്ദ്രീകരിച്ച് പ്രവർത്തിക്കുന്ന വള്ളമാണിത്.
ഫിഷറീസ് ഡെപ്യൂട്ടി ഡയറക്ടർ കെ.ബെൻസൺ തുടർനടപടികൾ സ്വീകരിച്ചു. യാനത്തിന് 30,000 രൂപ പിഴ അടപ്പിച്ചു. 1500 കിലോ ചെറു മത്സ്യം കടലിൽ കളഞ്ഞു.തുടർന്നുള്ള ദിവസങ്ങളിൽ പരിശോധന കർശനമാക്കുമെന്ന് ഫിഷറീസ് അസി. ഡയറക്ടർ പി.അനീഷ് അറിയിച്ചു.ഫിഷറീസ് എക്സ്റ്റൻഷൻ ഓഫീസർ അളക, ഫിഷറീസ് ഓഫീസർ റിയാസ് റഹ്മാൻ, ജോബി, മറൈൻ എൻഫോഴ്‌സ്‌മെന്റ് ഉദ്യോഗസ്ഥർ സംഗീത് ജോബ്, റോയ്, സീ ഗാർഡുമാരായ ജിപ്‌സൺ, ബിനോയ് എന്നിവരടങ്ങുന്ന ടീമാണ് വള്ളം കസ്റ്റഡിയിൽ എടുത്തത്.