കിഴക്കമ്പലം: ബൈക്ക് കനാലിലേക്ക് മറിഞ്ഞ്, പട്ടിമറ്റം കൈതക്കാട് കല്ലേരിൽ പരേതനായ ചന്ദ്രന്റെ മകൻ കെ.സി. സന്തോഷ് (41) മരിച്ചു. ഞായറാഴ്ച രാത്രി പട്ടിമറ്റത്ത് നിന്ന് കുമ്മനോട്ടെ വീട്ടിലേക്ക് പോകവേ കുമ്മനോട് മാന്ത്രയ്ക്കൽ അമ്പലത്തിന് മുന്നിലുള്ള പെരിയാർവാലി കനാലിലേക്കാണ് വീണത്. അടുത്തിടെ ബണ്ട് പൊട്ടിയതിനെ തുടർന്ന് പണി പൂർത്തിയാക്കിയ ഭാഗത്ത് ഒരു വശം ചേർന്നാണ് ബൈക്ക് കിടന്നത്. മൂന്ന് മീറ്റർ അകലെ സന്തോഷിനെ കമഴ്ന്നു കിടക്കുന്ന നിലയിൽ കണ്ടെത്തി. തലയ്ക്ക് ഗുരുതരമായി പരിക്കേറ്റിരുന്നു.

രാത്രി വൈകിയും വീട്ടിലെത്താത്തതിനെ തുടർന്ന് ബന്ധുക്കളും സുഹൃത്തുക്കളും രാത്രി വ്യാപകമായി തെരച്ചിൽ നടത്തിയെങ്കിലും കനാൽ ബണ്ടിനോട് ചേർന്ന് കിടന്ന ബൈക്ക് കണ്ടത്താനായിരുന്നില്ല. ഇന്നലെ രാവിലെ 7മണിയോടെ സമീപവാസികൾ ബൈക്ക് കണ്ട് നടത്തിയ തെരച്ചിലിലാണ് മൃതദേഹം കണ്ടെത്തിയത്.

ഭാര്യ: പാങ്കോട് ചക്യാംപുറത്ത് കുടുംബാംഗം പൂജ. മക്കൾ: ആദവ്, ആരുഷ്. മാതാവ്: ലീല. കുന്നത്തുനാട് പൊലീസ് മേൽനടപടികൾ സ്വീകരിച്ചു. സംസ്കാരം നടത്തി.