മൂവാറ്റുപുഴ: കാലവർഷക്കെടുതിയുടെ ഭാഗമായി വെള്ളം കയറുന്ന ഇടങ്ങളിൽ ഡി.വൈ.എഫ്.ഐ മൂവാറ്റുപുഴ യൂത്ത് ബ്രിഗേഡ് സഹായങ്ങൾക്കായി രംഗത്തിറങ്ങി. മൂവാറ്റുപുഴയിൽ ദുരിതാശ്വാസ ക്യാമ്പുകൾ തുറന്നിരിക്കുന്ന സ്കൂളുകളിലും മറ്റ് സ്ഥലങ്ങളിലും കഴിയുന്ന ആളുകൾക്ക് സഹായം എത്തിക്കാൻ ഡി.വൈ.എഫ്.ഐ യൂത്ത് ബ്രിഗേഡ് നേതൃത്വം നൽകും. മൂവാറ്റുപുഴ ഗവൺമെന്റ് ഹോമിയോ ആശുപത്രിയിൽ വെള്ളം കയറിയതിന്റെ ഭാഗമായി മരുന്നും മറ്റുരു സാധനസാമഗ്രികളും സുരക്ഷിതസ്ഥാനത്തേക്ക് മാറ്റുന്നതിന് ജീവനക്കാരോടൊപ്പം യൂത്ത് ബ്രിഗേഡ് രംഗത്തുണ്ട്. ഡി.വൈ.എഫ്.ഐ ജില്ലാ പ്രസിഡന്റ് അനീഷ് എം. മാത്യു , ബ്ലോക്ക് സെക്രട്ടറി ഫെബിൻ പി.മൂസ, മുൻ ബ്ലോക്ക് സെക്രട്ടറി സജി ജോർജ് എന്നിവർ പ്രവർത്തനങ്ങൾക്ക് നേതൃത്വം നൽകി.