തൊടുപുഴ: പത്രാധിപർ, എഴുത്തുകാരൻ, പത്രപ്രവർത്തകൻ, വിവർത്തകൻ, കാർട്ടൂണിസ്റ്റ്, ആർ.എസ്.എസ് പ്രചാരകൻ, ഭാഷാപണ്ഡിതൻ തുടങ്ങി മേഖലകളിലൂടെ പ്രശസ്തനായ പി. നാരായണന്റെ നവതി ആഘോഷങ്ങൾക്ക് 25ന് തൊടുപുഴയിൽ തുടക്കമാകും. 25ന് വൈകിട്ട് അഞ്ച് മുതൽ തൊടുപുഴ ഇടയ്ക്കാട്ടുകയറ്റം ജോഷ് പവലിയനിൽ 'സംഘപഥത്തിലെ നാരായണം' എന്ന പേരിൽ സംഘടിപ്പിക്കുന്ന കുടുംബ സംഗമത്തിൽ രാഷ്ട്രീയ സ്വയം സേവക സംഘം അഖില മുൻ സഹ സർകാര്യവാഹ് വി. ഭാഗയ്യാ മുഖ്യപ്രഭാഷണം നടത്തും. പ്രസ് അക്കാദമി മുൻ ചെയർമാൻ തോമസ് ജേക്കബ് അദ്ധ്യക്ഷത വഹിക്കും. മുൻ ഡി.ജി.പി ജേക്കബ് തോമസ്, രാഷ്ട്രീയ നീരീക്ഷകൻ അഡ്വ. എ. ജയശങ്കർ, ആർ.എസ്.എസ് മുൻ അഖില ഭാരതീയ കാര്യകാരി സദസ്യൻ എസ്. സേതുമാധവൻ, ഭാരതീയ വിചാരകേന്ദ്രം ഡയറക്ടർ ആർ. സഞ്ജയൻ, ബി.ജെ.പി. മുൻ സംസ്ഥാന അദ്ധ്യക്ഷൻ കെ. രാമൻ പിള്ള എന്നിവർ സംസാരിക്കും. പി. നാരായണൻ മറുപടി പ്രസംഗം നടത്തും. തപസ്യ സംസ്ഥാന വർക്കിംഗ് പ്രസിഡന്റ് പ്രൊഫ. പി.ജി. ഹരിദാസ് സ്വാഗതവും നവതി ആഘോഷ സമിതി സംയോജകൻ എ. സന്തോഷ് ബാബു നന്ദിയും പറയും. പി.നാരായണൻ രചിച്ച 'സംഘപഥത്തിലൂടെ' എന്ന പുസ്തകത്തിന്റെ രണ്ടാം ഭാഗത്തിന്റെ പ്രീ പബ്ലിക്കേഷൻ ഉദ്ഘാടനവും പി. നാരായണൻ പരിഭാഷപ്പെടുത്തിയ മധുശ്രീ മുഖർജിയുടെ 'ബ്രിട്ടീഷ് ഇന്ത്യ ഇരുണ്ടകാലം' എന്ന പുസ്തകത്തിന്റെ മലയാള പരിഭാഷയുടെ പ്രകാശനവും ചടങ്ങിൽ നടക്കും. പി. നാരായൺജി രചിക്കുകയും തർജ്ജമ ചെയ്യുകയും ചെയ്ത പുസ്തകങ്ങളുടെ പ്രദർശനവും വിൽപ്പനയും പി. നാരായണനെക്കുറിച്ച് തയ്യാറാക്കിയ ഡോക്കുമെന്ററിയുടെ പ്രദർശനവും സമ്മേളനത്തോടനുബന്ധിച്ച് നടക്കും. സമ്മേളനാന്തരം കലാനിശയും ഉണ്ടാകും.