കട്ടപ്പന :പള്ളിക്കവല ഫോർത്തുനാത്തൂസ് നഗറിൽ കഴിഞ്ഞ ദിവസം രാത്രിയിൽ വിവാഹ സൽക്കാരത്തിന്റെ മാലിന്യങ്ങൾ ആറ്റിലേക്ക് തള്ളി തെരുവുനായ്ക്കൾ ഭക്ഷണാവശിഷ്ടങ്ങൾ വലിച്ചിഴച്ചപ്പോഴാണ് പ്രദേശവാസികളുടെ ശ്രദ്ധയിൽ പെടുന്നത്. പത്തോളം ചാക്കുകളിലായിയാണ് മാലിന്യം തള്ളിയിരിക്കുന്നത്. വിവരം നഗരസഭയെ അറിയിച്ചതനുസരിച്ച് ആരോഗ്യ വിഭാഗം സ്ഥലത്ത് പരിശോധന നടത്തി മാലിന്യം തള്ളിയവരെ കണ്ടെത്തുകയും ചെയ്തു. കട്ടപ്പനയിൽ തിങ്കളാഴ്ച്ച നടന്ന വിവാഹസദ്യയുടെ അവശിഷ്ട്ങ്ങളാണ് തള്ളിയതെന്ന് കണ്ടെത്തി. ഓഡിറ്റോറിയം നടത്തിപ്പുകാർക്കും വിവാഹം നടത്തിയവർക്കും കേറ്ററിംഗ് സർവ്വീസ് ഉടമക്കും നഗരസഭ ആരോഗ്യ വിഭാഗം നോട്ടീസ് നൽകുമെന്ന് അറിയിച്ചു. നഗരസഭ ആരോഗ്യ വിഭാഗം ജെ എച്ച്. ഐ.പി എസ് അനുപ്രിയ, ബിബിൻ തോമസ് എന്നിവരുടെ നേതൃത്വത്തിലാണ് പരിശോധന നടത്തിയത്.