കഞ്ഞിക്കുഴി: ആദ്യ പരിശ്രമത്തിൽ പരാജയപ്പെട്ടാൽ മറ്റുള്ളവരുടെ കുറ്റപ്പെടുത്തലുകൾ കേട്ട് വിദ്യാർത്ഥികൾ ഒരിക്കലും ലക്ഷ്യത്തിൽ നിന്നും പിന്മാറരുതെന്നും അവസാനം വരെ വിജയത്തിനുവേണ്ടി പൊരുതണമെന്ന് ജില്ലാ പൊലീസ് മേധാവി വിഷ്ണു പ്രദീപ് ടി .കെ പറഞ്ഞു. പ്ലസ്ടു , എസ്.എസ് .എൽ .സി , വി.എച്ച്. എസ്. സി പരീക്ഷകളിൽ ഉന്നത വിജയം നേടിയ വിദ്യാർത്ഥികളെ അനുമോദിക്കാനായി കഞ്ഞിക്കുഴി എസ്.എൻ ഹയർ സെക്കന്ററി സ്‌കൂളിൽ നടത്തിയ മെറിറ്റ് ഡേ ഉദ്ഘാടനം ചെയ്യുകയായിരുന്നു അദ്ദേഹം.കോമേഴ്‌സ് സ്ട്രീമിൽ നൂറു ശതമാനം വിജയം ഉൾപ്പെടെ പ്ലസ് ടു , വി എച്ച്.എസ് സി വിഭാഗങ്ങളിലായി അറുപതോളം കുട്ടികൾ ഫുൾ എ പ്ലസ് നേട്ടം നേടിയിരുന്നു ഉന്നത വിജയം നേടിയ വിദ്യാർത്ഥികളെ അദ്ദേഹം അനുമോദിച്ചു. നമ്മുടെ സ്വപ്‌നങ്ങൾ നമ്മൾ തന്നെ രൂപപ്പെടുത്താനും അത് മറ്റുള്ളവരുടെ ഇഷ്ടങ്ങൾക്കു അനുസരിച്ചാവാതിരിക്കാൻ ശ്രദ്ധിയ്ക്കണമെന്നും അദ്ദേഹം ഓർമിപ്പിച്ചു. കഠിന പ്രയത്‌നം ചെയ്താൽ ഏതൊരു സാധാരണക്കാരനും വിജയത്തിലെത്താൻ പറ്റുമെന്നും അദ്ദേഹം പറഞ്ഞു.
ചടങ്ങിൽ സ്‌കൂൾ മാനേജർ ബിജു മാധവൻ അദ്ധ്യക്ഷനായിരുന്നു. കുട്ടികൾ സമൂഹത്തിനു സേവനം ചെയ്യുന്നതിന് ഉന്നത നിലയിലെത്തുവാൻ സാധിക്കുന്ന ഒരു വ്യക്തി ആവണം എന്ന സ്വപ്നവുമായി വേണം തങ്ങളുടെ ജീവിത യാത്ര തുടരേണ്ടതെന്നു അദ്ദേഹം പറഞ്ഞു. കഞ്ഞിക്കുഴി പഞ്ചായത്ത് പ്രസിഡണ്ട് വക്കച്ചൻ വയലിൽ മുഖ്യ പ്രഭാഷണം നടത്തി. പി ടി എ പ്രസിഡന്റ് മനേഷ് കുടിക്കായത്ത്, എസ്. എൻ.ഡി.പി യോഗം തൊടുപുഴ യൂണിയൻ അഡ്മിനിസ്ട്രേറ്റീവ് കമ്മറ്റിയംഗം എസ്. ബി സന്തോഷ് , പി .ടി എ വൈസ് പ്രസിഡന്റ് ശ്രീലേഷ് രാജു, കഞ്ഞിക്കുഴി ശാഖാ പ്രസിഡന്റ് ചന്ദ്രൻകുട്ടി പൊങ്ങൻപാറയിൽ , മിനി ജെയിംസ്, മിനി ഗംഗാധരൻ എന്നിവർ പ്രസംഗിച്ചു. ഹയർ സെക്കന്ററി വിഭാഗം പ്രിൻസിപ്പാൾ രാജി ജോസഫ് സ്വാഗതവും വി. എച്ച്. എസ്. സി പ്രിൻസിപ്പാൾ ബൈജു എം .ബി നന്ദിയും പറഞ്ഞു.