photo
തുമ്പ പ്രവർത്തകർ ചെറുപുഴയിൽ നിന്ന് പായലും പുല്ലും നീക്കം ചെയ്യുന്നു

കൊയിലാണ്ടി: പായലും പുല്ലും മാലിന്യങ്ങളും നിറഞ്ഞ് ഒഴുക്ക് നിലച്ച ചെറുപുഴയിലേക്ക് ഒരുപറ്റം പ്രകൃതി സ്നേഹികൾ ഇറങ്ങിയതോടെ പുഴയൊഴുകി തുടങ്ങി. കീഴരിയൂർ പൊടിയാടി അകലാപ്പുഴയോട് ചേർന്നു കിടക്കുന്ന ചെറുപുഴയിലാണ് തുമ്പ പരിസ്ഥിതി സമിതിയുടെ നേതൃത്വത്തിൽ പുഴശുചീകരണം നടത്തിയത്. നടക്കൽ പാലത്തിൽ ഉള്ള ഷട്ടറുകൾ അടച്ചാൽ ശുദ്ധജലം ലഭ്യമായിരുന്ന ഈ നീർത്തടത്തെ വർഷങ്ങൾക്ക് മുമ്പ് വരെ കുളിക്കാനും നീന്തൽ പഠിക്കാനും പ്രദേശത്തുകാർ ആശ്രയിച്ചിരുന്നു.ധാരാളം മത്സ്യസമ്പത്തുമുണ്ടായിരുന്നു. കാലക്രമേണ പായലും മാലിന്യവും അടിഞ്ഞു കൂടി. തോണിക്ക് പോലും സഞ്ചരിക്കാൻ പറ്റാത്ത അവസ്ഥയിൽ എത്തിയപ്പോഴാണ് ജനകീയ പിന്തുണയിൽ ശുചീകരണ പ്രവർത്തനം നടത്താൻ തീരുമാനിച്ചത്. പഴയകാല മത്സ്യ കർഷകൻ ചെറുകുനി ഗോപാലൻ ഉദ്ഘാടനം ചെയ്തു. ദിനീഷ്ബേബി കബനി അദ്ധ്യക്ഷത വഹിച്ചു. എം. സുരേഷ്, ഗോപാലൻ കുറ്റിയോയത്തിൽ , കെ. സുരേഷ് ബാബു , സാബിറ നടുക്കണ്ടി എന്നിവർ പ്രസംഗിച്ചു. ദാസൻ ഇടക്കളംകണ്ടി,കെ. മുരളീധരൻ, യു. ശ്രീനിവാസൻ,സായ് പ്രകാശ് എൻ.കെ, സൈനുദ്ധീൻ.എ, സംഗീത സി. പി, കെ.ടി പുഷ്പ എന്നിവർ നേതൃത്വം നൽകി.