പാലാ: വലവൂർ ഗവ.യുപി സ്‌കൂളിലെ കുരുന്നുകളെ എത്ര അഭിനന്ദിച്ചാലും മതിയാവില്ല. സ്കൂൾ മുറ്റത്തെ 5 സെന്റിൽ അവർ തീർക്കുന്ന വിദ്യാവനം പ്രകൃതിസംരക്ഷത്തിന്റെ വേറിട്ടമാതൃകയാണ്. ജാപ്പനീസ് വനവത്ക്കരണ രീതിയായ മിയാവാക്കി വനമാണ് തയാറാക്കുന്നത്.

സ്‌കൂൾ കോമ്പൗണ്ടിലെ അഞ്ച് സെന്റ് സ്ഥലത്താണ് ജാപ്പനീസ് വനവത്ക്കരണ രീതിയായ മിയാവാക്കി വനം തയ്യാറാക്കുന്നത്.മരങ്ങളുടെ വൈവിധ്യമേറിയ ശേഖരമാണിത്. ഒരു ചതുരശ്ര മീറ്ററിൽ 4,5 ചെടികളാണ് നടുന്നത്. വള്ളി ചെടികൾ, കുറ്റിചെടികൾ, ചെറു മരങ്ങൾ, വൻ മരങ്ങൾ എന്നിവയെല്ലാമുണ്ട്. രുദ്രാക്ഷം, കുമ്പിൾ, കമ്പകം, നെടുനാര്, പന, ചാമ്പ, പേര, ടെക്കോമ, റംബുട്ടാൻ, ദന്തപ്പാല, കറിവേപ്പ്, മൂട്ടിപ്പുളി, ആര്യവേപ്പ്, ഈട്ടി, തേക്ക്, ജാതി, വയ്യങ്കത, നെല്ലി, അശോകം എന്നിവ തിലകക്കുറിയാകും. കേരള ഫോറസ്റ്റ് ഡിപ്പാർട്ട്‌മെന്റ് സോഷ്യൽ ഫോറസ്റ്ററി ക്ലബ്ബിന്റെ ആഭിമുഖ്യത്തിലാണ് പദ്ധതിക്ക് തുടക്കമിട്ടത്. കരൂർ ഗ്രാമപഞ്ചായത്ത് വൈസ് പ്രസിഡന്റ് ബെന്നി മുണ്ടത്താനം വൃക്ഷത്തൈനട്ട് പദ്ധതി ഉദ്ഘാടനം ചെയ്തു.

കുരുന്നുകൾ പരിപാലിക്കും

വിദ്യാവനത്തിന്റെ പരിപാലന ചുമതല വിദ്യാർത്ഥിക്കാണ്. ഓരോ സസ്യവും തിരിച്ചറിയുന്നതിന് ക്യു ആർ കോഡ് ഉള്ള ലേബൽ ഓരോ വർഷത്തിലും ടാഗ് ചെയ്യുമെന്ന് ഫോറസ്റ്റ് അധികാരികൾ അറിയിച്ചു. പൊൻകുന്നം ഫോറസ്റ്റ് റേഞ്ച് ഓഫീസർ ഹരികുമാർ, ഡെപ്യൂട്ടി ഫോറസ്റ്റ് റേഞ്ച് ഓഫീസർ ലാൽ, ഫോറസ്റ്റ് ഓഫീസർ അരുൺ, ഹെഡ്മാസ്റ്റർ രാജേഷ് എൻ വൈ, പി.ടി.എ അംഗങ്ങളായ ജിജി ഫിലിപ്പ്, ഷെൽമി ജ്യോതിഷ്, സന്ധ്യ ബിജു, വിദ്യ അനൂപ്, ഷാജി എന്നിവരും നേച്ചർ ക്ലബ് കോഓർഡിനേറ്റർ ഷാനി മാത്യു, അദ്ധ്യാപകരായ റോഷ്‌നി, ജ്യോൽസിനി, ചാൾസി, അഞ്ജു, രാഹുൽ എന്നിവർ സംബന്ധിച്ചു.

ഫോട്ടോ അടിക്കുറിപ്പ്

വലവൂർ ഗവ.യുപി സ്‌കൂളിൽ വിദ്യാവനം പദ്ധതിയുടെ ഭാഗമായി ഹെഡ്മാസ്റ്റർ എൻ.വൈ. രാജേഷ് വൃക്ഷത്തൈ നടുന്നു.