കൊച്ചി: വാഹന നിർമ്മാതാക്കൾ തുടർച്ചയായി വില വർദ്ധിപ്പിച്ചതോടെ അഞ്ച് ലക്ഷം രൂപയിൽ താഴെയുള്ള കാറുകൾ തുലോം കുറയുന്നു. നിലവിൽ മൂന്ന് മോഡലുകൾ മാത്രമാണ് അഞ്ച് ലക്ഷം രൂപയിലും കുറവിൽ വിപണിയിൽ ലഭ്യമാകുന്നത്. കുറഞ്ഞ വിലയിൽ കാർ വാങ്ങുന്നവർക്ക് നിലവിൽ മാരുതി സുസുക്കി ആൾട്ടോ കെ10, മാരുതി സുസുക്കി എസ്പ്രസ്സോ, റെനോ ക്വിഡ് എന്നീ മൂന്ന് ഓപ്ഷനുകൾ മാത്രമാണ് അവശേഷിക്കുന്നത്.

മാരുതി സുസുക്കി ആൾട്ടോ കെ10

രാജ്യത്തെ ഏറ്റവും വലിയ വാഹന നിർമ്മാതാക്കളായ മാരുതി സുസുക്കിയുടെ ഒരു കാലത്തെ ഏറ്റവും ജനപ്രിയമായ മോഡലായിരുന്നു ആൾട്ടോ. രാജ്യത്ത് ഇതുവരെ ഏറ്റവുമധികം വിൽപ്പന നേടിയതും ആൾട്ടോയാണ്. നിലവിൽ ആൾട്ടോ കെി10 മാത്രമാണ് വിപണിയിലുള്ളത്.

3.99 ലക്ഷം രൂപ മുതലാണ് ആൾട്ടോ കെ10ന്റെ വില (എക്സ്‌ഷോറൂം). ഇത് 1.0 ലിറ്റർ കെ10സി പെട്രോൾ എഞ്ചിനാണ് ഉപയോഗിക്കുന്നത്, ഇത് 67പിഎസ് പരമാവധി കരുത്തും 89എൻഎം പീക്ക് ടോർക്കും നൽകുന്നു.

മാരുതി എസ്പ്രസ്സോ

മാരുതിയുടെ സാധാരണക്കാരെ ലക്ഷ്യമിടുന്ന പ്രധാന മോഡലാണ് എസ്പ്രസ്സോ. 4.26 ലക്ഷം രൂപയിലാണ് ഇതിന്റെ എക്സ് ഷോറൂം വില . ആൾട്ടോ കെ10ന്റെ എഞ്ചിനാണ് ഇതിലുള്ളത്, മാനുവൽ ട്രാൻസ്മിഷനുള്ള കാറിന്റെ അടിസ്ഥാന വേരിയന്റിന് മാത്രമാണ് 5 ലക്ഷം രൂപയിൽ താഴെ വില.

റെനോ ക്വിഡ്

വലിയ എഞ്ചിനോടെയുള്ള റെനോ ക്വിഡിന് നിലവിൽ പ്രാരംഭ വില 4.69 ലക്ഷം രൂപ മുതലാണ് എക്സ്‌ഷോറൂം വില. 68പിഎസ് പരമാവധി കരുത്തും 91എൻഎം പീക്ക് ടോർക്കും പുറപ്പെടുവിക്കുന്ന 1.0ലിറ്റർ എസ്‌സിഇ പെട്രോൾ എഞ്ചിനാണ് ക്വിഡ് ഉപയോഗിക്കുന്നത്.

ഇൻപുട്ട് ചെലവുകൾ വർധിച്ചതിനാൽ ഇന്നത്തെ കാറുകൾക്ക് വിലകൂടിയിരിക്കുകയാണ്. ഇൻപുട്ട് ചെലവുകൾക്കുള്ളിൽ, മെറ്റീരിയൽ ചെലവുകൾ വലിയ രീതിയിൽ വർദ്ധിച്ചു. കാർ നിർമ്മാതാക്കൾ ഈ വില വർദ്ധനയിലൂടെ അതിന്റെ ആഘാതം വാഹനം വാങ്ങാനെത്തുന്ന ഉപഭോക്താക്കൾക്ക് കൈമാറുന്നു.