സുനക്കിന്റെ കൺസർവേറ്റിവ് പാർട്ടി തകർന്നടിഞ്ഞു
ലണ്ടൻ: ബ്രിട്ടനിൽ 14 വർഷത്തെ കൺസർവേറ്റീവ് ഭരണത്തിന് അന്ത്യം കുറിച്ച്, പ്രതിപക്ഷ ലേബർ പാർട്ടിക്ക് തിരഞ്ഞെടുപ്പിൽ ചരിത്ര വിജയം. ലേബർ പാർട്ടി അദ്ധ്യക്ഷനും പ്രതിപക്ഷ നേതാവുമായ സർ കിയർ റോഡ്നി സ്റ്റാമറാണ് പുതിയ പ്രധാനമന്ത്രി.
650 അംഗ പൊതുസഭയിൽ ലേബർ പാർട്ടി 412 സീറ്റാണ് നേടിയത്. ഭൂരിപക്ഷത്തിന് 326 സീറ്റ് മതി. ബ്രിട്ടനിലെ ഒരു പാർട്ടി നേടുന്ന ഏറ്റവും വലിയ വിജയമാണിത്.
പ്രധാനമന്ത്രി ഋഷി സുനക്കിന്റെ കൺസർവേറ്റിവ് പാർട്ടിക്ക് വെറും 121 സീറ്റാണ് കിട്ടിയത്. ചരിത്രത്തിലെ ഏറ്റവും വലിയ തകർച്ച. നിലവിലുള്ള സഭയിലെ 202 സീറ്റാണ് ലേബർ പാർട്ടി ഇരട്ടിയാക്കി വർദ്ധിപ്പിച്ചത്. കൺസർവേറ്റിവ് പാർട്ടിക്ക് 344 സീറ്റുണ്ടായിരുന്നു.
സുനക്ക് ബക്കിംഗ്ഹാം കൊട്ടാരത്തിൽ ചാൾസ് മൂന്നാമൻ രാജാവിനെ സന്ദർശിച്ച് രാജി സമർപ്പിച്ചു. പിന്നാലെ കിയർ സ്റ്റാമറും ചാൾസ് രാജാവിനെ സന്ദർശിച്ചു. രാജാവ് മുമ്പാകെ സ്റ്റാമർ പ്രധാനമന്ത്രിയായി സത്യപ്രതിജ്ഞ ചെയ്‌തു.
സുനക്കിന് കൺസർവേറ്റിവ് പാർട്ടി നേതൃസ്ഥാനവും നഷ്ടമാവും. പുതിയ നേതാവിനെ തിരഞ്ഞെടുക്കും വരെ അദ്ദേഹം സ്ഥാനത്ത് തുടരും.
സുനക്ക് ജയിച്ചെങ്കിലും അദ്ദേഹത്തിന്റെ 11 മന്ത്രിമാർ പരാജയപ്പെട്ടു. ബ്രിട്ടീഷ് തിരഞ്ഞെടുപ്പിൽ ഇത്രയധികം മന്ത്രിമാർ തോൽക്കുന്നത് റെക്കോഡാണ്. പാർട്ടിയുടെ മുൻപ്രധാനമന്ത്രി ലിസ് ട്രസും തോറ്റു. 1997ൽ ഏഴ് മന്ത്രിമാർ തോറ്റതാണ് മുൻ റെക്കോഡ്.
മറ്റ് കക്ഷികൾ
ലിബറൽ ഡെമോക്രാറ്റിക് - 71
സിൻഫീൻ - 7
റിഫോം യുകെ - 4
ഗ്രീൻ പാർട്ടി - 4
സ്കോട്ടിഷ് നാഷണൽ പാർട്ടി - 9
മറ്റുള്ളവർ - 22
മലയാളി സോജനും
ബ്രിട്ടീഷ് എം.പി
കേരളത്തിന് അഭിമാനമായി ബ്രിട്ടീഷ് പാർലമെന്റിൽ ഇത്തവണ മലയാളി സാന്നിദ്ധ്യവും. കോട്ടയം ഓണംതുരുത്ത് സ്വദേശി സോജൻ ജോസഫാണ് ലേബർ ടിക്കറ്റിൽ വിജയിച്ചത്. കൺസർവേറ്റീവ് പാർട്ടിയുടെ കുത്തക സീറ്റായിരുന്ന ആഷ്ഫഡിൽ അട്ടിമറി വിജയമാണ് സോജൻ നേടിയത്.
ഇത്തവണ പത്ത് സിക്ക് വംശജരും യു. കെ പാർലമെന്റിലേക്ക് വിജയിച്ചിട്ടുണ്ട്. ഋഷി സുനക് ഉൾപ്പെടെ 15ലേറെ ഇന്ത്യൻ വംശജർ ജയിച്ചതായാണ് റിപ്പോർട്ട്.
വിജയം പൊരുതി നേടുന്നതാണ്. മഹത്തായ രാജ്യത്തിന്റെ ചുമലിൽ നിന്ന് ഒരു ശാപം ഒഴിവായി. 14 വർഷത്തിന് ശേഷം രാജ്യത്തിന്റെ ഭാവി നാം വീണ്ടെടുത്തു
--കിയർ സ്റ്റാമർ
തോൽവിയുടെ പൂർണ ഉത്തരവാദിത്വം ഏറ്റെടുക്കുന്നു. ഏറ്റവും മികച്ച രാജ്യത്തിന്റെ പ്രധാനമന്ത്രി പദത്തിൽ നിന്നാണ് ഞാൻ വിടവാങ്ങുന്നത്
--ഋഷി സുനക്