ഒരു വീട്ടിലെ ഏറ്റവും പ്രധാന സ്ഥാനങ്ങളിലൊന്നാണ് ഡൈനിംഗ് ഹാൾ. ആഹാരം കഴിക്കാനുള്ള സ്ഥലം എന്നതിനെക്കാൾ വീട്ടുകാരുടെ മൊത്തത്തിലുള്ള ഭാവി തീരുമാനിക്കുന്ന സ്ഥലം കൂടിയാണ് ഡൈനിംഗ് ഹാൾ എന്നാണ് വാസ്തുശാസ്ത്രം പറയുന്നത്. അതിനാൽ അവിടെ ഉറപ്പായും പാലിക്കേണ്ട ചില കാര്യങ്ങൾ ഉണ്ട്. ഇതിൽ എന്തെങ്കിലും പാകപ്പിഴ ഉണ്ടായാൽ വീടിന്റെയും വീട്ടുകാരുടെയും ഐശ്വര്യം ഇല്ലാതാക്കും. ഡൈനിംഗ് ടേബിൾ ഉണ്ടാക്കാൻ ഉപയോഗിക്കുന്ന വസ്തുവും കസേരകളുടെ എണ്ണവും വരെ ശ്രദ്ധിക്കണമെന്നാണ് വാസ്തുവിദഗ്‌ധർ പറയുന്നത്.

തടികൊണ്ടുള്ള ഡൈനിംഗ് ടേബിൾ ആണ് ഏറെ നന്ന്. ഗ്ലാസ് കൊണ്ടുണ്ടാക്കിയ മേശകളും യോജിച്ചതാണ്. ഇവ പോസിറ്റീവ് എനർജി കൊണ്ടുവരും എന്നാണ് വിശ്വാസം. മറ്റു വസ്തുക്കൾ കൊണ്ടുള്ളവ കഴിയുമെങ്കിൽ ഒഴിവാക്കുന്നതാണ് നല്ലത്. ചതുരാകൃതിയുള്ള മേശകളാണ് ഏറ്റവും യോജിച്ചത്. കസേരകളുടെ എണ്ണം ഇരട്ട അക്കം ആയിരിക്കാനും ശ്രദ്ധിക്കുക. അതായത് രണ്ട്, നാല്, ആറ് എന്ന ക്രമത്തിൽ. ഒറ്റഅക്കം ദൗർഭാഗ്യത്തെ കൊണ്ടുവരും എന്നാണ് വാസ്ത‌ു ശാസ്ത്രം പറയുന്നത്. ആഹാരം കഴിക്കുമ്പോൾ വീട്ടിലെ ഏറ്റവും മുതിർന്ന ആളിനെ കിഴക്കുവശത്ത് ഇരുത്താൻ പ്രത്യേകം ശ്രദ്ധിക്കണം. അല്ലെങ്കിൽ ദോഷങ്ങൾ ഉണ്ടാവുമെന്നാണ് വിശ്വസിക്കപ്പെടുന്നത്.

ഡൈനിംഗ് ഹാളിൽ എപ്പോഴും മനോഹരവും ആഹ്ളാദം ജനിപ്പിക്കുന്നതുമായ ചിത്രങ്ങൾ മാത്രം ഉപയോഗിക്കാൻ ശ്രദ്ധിക്കണം. കറുപ്പുനിറത്തിലുള്ള ചിത്രങ്ങൾ ഒരിക്കലും ഉപയോഗിക്കരുത്. ഡൈനിംഗ് ടേബിളിന് നടുവിലായി പഴങ്ങൾ നിറച്ച പാത്രം വയ്ക്ക്കുന്നത് നന്നായിരിക്കും. ചെടികൾ വയ്ക്കുന്നുണ്ടെങ്കിൽ നല്ല പുഷ്ടിയോടെ വളരുന്നവ മാത്രം ഉപയോഗിക്കുക. അല്ലാത്തവ തീർച്ചയായും ഒഴിവാക്കണം.

.