കൊച്ചി: നടപ്പു സാമ്പത്തിക വർഷത്തിലെ ആദ്യ മൂന്ന് മാസങ്ങളിൽ രാജ്യത്തെ ലൈഫ് ഇൻഷ്വറൻസ് കമ്പനികളുടെ ആദ്യ പ്രീമിയം ബിസിനസിൽ 23 ശതമാനം വർദ്ധന. പൊതു, സ്വകാര്യ കമ്പനികളുടെ ഇൻഷ്വറൻസ് ബിസിനസിൽ മികച്ച വളർച്ചയാണ് ദൃശ്യമാകുന്നതെന്നത്. ലൈഫ് ഇൻഷ്വറൻസ് കൗൺസിലിന്റെ കണക്കുകളനുസരിച്ച് കമ്പനികളുടെ ആദ്യ ബിസിനസ് പ്രീമിയം 22.91 ശതമാനം വർദ്ധനയോടെ 89,726.7 കോടി രൂപയിലെത്തി. മുൻവർഷം ഇതേകാലയളവിൽ 73,004.87 കോടി രൂപയായിരുന്നു പുതിയ ബിസിനസ് പ്രീമിയം. രാജ്യത്തെ ഏറ്റവും വലിയ ഇൻഷ്വറൻസ് കമ്പനിയായ ലൈഫ് ഇൻഷ്വറൻസ് കോർപ്പറേഷന്റെ(എൽ.ഐ.സി) പുതിയ പ്രീമിയം ബിസിനസ് ഏപ്രിൽ-ജൂൺ കാലയളവിൽ 28.11 ശതമാനം ഉയർന്ന് 57,440.9 കോടി രൂപയിലെത്തി. വിപണിയിൽ മുഖ്യ വിഹിതമുള്ള എൽ.ഐ.സിയുടെ ഗ്രൂപ്പ് പ്രീമിയം 33.49 ശതമാനം ഉയർന്ന് 44,671.86 കോടി രൂപയായി.

അവലോകന കാലയളവിൽ സ്വകാര്യ ഇൻഷ്വറൻസ് കമ്പനികളുടെ പ്രീമിയം 14.62 ശതമാനം ഉയർന്ന് 32,285.8 കോടി രൂപയിലെത്തി. എസ്.ബി.ഐ ലൈഫ് ഇൻഷ്വറൻസിന്റെ പ്രീമിയം 13 ശതമാനം വളർച്ചയോടെ 7,032.69 കോടി രൂപയും ഐ.സി.ഐ.സി.ഐ 23.5 ശതമാനം വളർച്ചയോടെ 3,768.55 കോടി രൂപയുമായി.