കോട്ടപ്പടി: മലപ്പുറത്ത് ട്രാൻസ്‌ഫോർമറിന് മുകളിൽ കുടുങ്ങിയ പെരുമ്പാമ്പിനെ രക്ഷപ്പെടുത്തി. കോട്ടപ്പടി വലിയവരമ്പിലെ കെഎസ്ഇബി ട്രാൻസ്ഫോർമറിന് മുകളിലാണ് പെരുമ്പാമ്പ് കയറിയത്. ഇന്ന് ഉച്ചയ്ക്ക് ഒരു മണിയോടെയായിരുന്നു സംഭവം നടന്നത്. വലിയവരമ്പ് ബെെപ്പാസിലെ ട്രാൻസ്ഫോർമറിന് മുകളിലാണ് ഉച്ചയോടെ നാട്ടുകാർ പെരുമ്പാമ്പിനെ കണ്ടത്.

ബെെപ്പാസിന് സമീപമുള്ള ഒഴിഞ്ഞ പാടത്ത് നിന്നാണ് പാമ്പ് വന്നതെന്നാണ് സംശയം. പാടത്ത് മഴ പെയ്ത് വെള്ളം നിറഞ്ഞിട്ടുണ്ട്. ഒഴുകിയെത്തിയ മഴയിൽ പാമ്പ് ജനവാസ മേഖലയിലെത്തിയതാണെന്ന് കരുതപ്പെടുന്നു. പാമ്പ് ട്രാൻസ്ഫോർമറിന് മുകളിലായതിനാൽ നാട്ടുകാർക്ക് ഒന്നും ചെയ്യാൻ സാധിച്ചില്ല. പിന്നാലെ നാട്ടുകാരാണ് കെഎസ്ഇബി ഉദ്യോഗസ്ഥരെ വിവരമറിയിച്ചത്.

തുടർന്ന് പാമ്പുപിടുത്ത വിദഗ്ദരെയെത്തിച്ച് പെരുമ്പാമ്പിനെ പിടികൂടുകയായിരുന്നു. ക്രെയിനിൽ കയറിയാണ് പാമ്പുപിടുത്ത വിദഗ്ദൻ പെരുമ്പാമ്പിനെ ചാക്കിലാക്കിയത്. വനം വകുപ്പിന് കെെമാറിയ പാമ്പിനെ വനത്തിൽ എത്തിച്ച് തുറന്നുവിട്ടു. പ്രദേശത്ത് മുൻപും പെരുമ്പാമ്പിനെ പിടികൂടിയിട്ടുണ്ടെന്ന് നാട്ടുകാർ പറയുന്നു.