സ്വന്തമായി ഒരു ബിസിനസ് ചെയ്യാൻ ആഗ്രഹിക്കുന്നവരാണോ നിങ്ങൾ? പുതിയ ആശയം നിറവേ​റ്റാൻ ആവശ്യമായ പണം എവിടെ നിന്ന് കണ്ടെത്തുമെന്ന സംശയം നിങ്ങൾക്കുണ്ടോ? എന്നാൽ ഇനി അത് വേണ്ട. നിങ്ങളുടെ ചെറിയ ബിസിനസ് സംരഭങ്ങൾ ആരംഭിക്കാനുളള സഹായം ഇനി സർക്കാരിന്റെ ഭാഗത്ത് നിന്നുണ്ടാകും. മുദ്ര ലോണിനെക്കുറിച്ച് അറിയാത്തവരായി ആരും തന്നെ കാണില്ല. മൂന്നാം മോദി സർക്കാരിന്റെ ആദ്യ ബഡ്ജ​റ്റ് സമ്മേളനത്തിൽ മുദ്ര ലോണിൽ നിന്നും ലഭിക്കുന്ന സാമ്പത്തിക സഹായം വർദ്ധിപ്പിക്കുമെന്ന പ്രഖ്യാപനമുണ്ടായിട്ടുണ്ട്.

സാധാരണയായി പത്ത് ലക്ഷം രൂപയുടെ വായ്പയായിരുന്നു ഇതിലൂടെ ലഭിച്ചിരുന്നത്. ഇപ്പോഴിതാ സാമ്പത്തിക സഹായം 20 ലക്ഷമാക്കി വർദ്ധിപ്പിച്ചിരിക്കുകയാണ്. മുദ്ര ലോണിനെക്കുറിച്ച് അറിയേണ്ട പ്രധാനപ്പെട്ട കാര്യങ്ങൾ.

എന്താണ് മുദ്ര ലോൺ

കാർഷികേതര സംരഭങ്ങളെ സഹായിക്കുന്നതിനും ചെറിയ വ്യവസായ ആശയങ്ങൾ സാക്ഷാൽക്കരിക്കുന്നതിനും കേന്ദ്രസർക്കാർ നടപ്പിലാക്കി തുടങ്ങിയ ഒരു പദ്ധതിയാണിത്. പ്രധാനമന്ത്രി മുദ്ര ലോൺ യോജന എന്നാണ് പദ്ധതിയുടെ പേര്. ഈ പദ്ധതിയുടെ കീഴിൽ ഉപയോക്താവിന് പത്ത് ലക്ഷം രൂപയുടെ ലോണും 35 ശതമാനം സബ്സിഡിയും ലഭിക്കും. എന്നാൽ ഇനി മുതൽ വായ്പാ തുക 20 ലക്ഷമായി മാറും. പദ്ധതിയുടെ കാലാവധി അഞ്ച് വർഷമാണ്.

ഈ പദ്ധതിയിൽ പലിശ നിരക്കുകൾ ഓരോ ബാങ്കുകൾക്കനുസരിച്ച് മാറും. ചെറുകിട വ്യവസായ സംരഭകർക്ക് സാമ്പത്തിക സഹായം നൽകുന്നതിനായി 2015 മുതലാണ് മോദി സർക്കാർ ഈ പദ്ധതി നടപ്പിലാക്കാൻ തീരുമാനിച്ചത്. വായ്പ നൽകുക മാത്രമല്ല ഈ പദ്ധതിയിലൂടെ നടക്കുന്നത്. സബ്സിഡിയും അനുവദിക്കുന്നുണ്ട്. ഉപയോക്താക്കളെ സ്വയം പര്യാപ്തരാക്കാനും പദ്ധതി സഹായകരമാകും. ശിശു വായ്പ, കിഷോർ വായ്പ, തരുൺ വായ്പ എന്നിങ്ങനെ മുന്ന് തരത്തിലുളള വായ്പകൾ പദ്ധതിക്ക് കീഴിൽ വരുന്നുണ്ട്. ഓരോ വായ്പകളും നിങ്ങളുടെ ബിസിനസ് ആശയങ്ങൾക്കനുസരിച്ച് മാറാം.

മുദ്ര വായ്പയുടെ ഗുണങ്ങൾ
1. ബഡ്ജ​റ്റ് പ്രഖ്യാപിക്കുന്നതിന് മുൻപ് മുദ്ര ലോണിലൂടെ 50,000 രൂപ മുതൽ പത്ത് ലക്ഷം രൂപ വരെയുളള തുക ലഭിക്കും.
2. വായ്പാ തുകയ്ക്ക് 35 ശതമാനം സബ്സിഡി ലഭിക്കും.
3. വായ്പയ്ക്ക് ഗ്യാരന്റി നൽകേണ്ടതില്ല.
4. ചെറുകിട ബിസിനസുകാർക്ക് വായ്പയുടെ സഹായത്തോടെ കൂടുതൽ വിപുലീകരിക്കാവുന്നതാണ്.

യോഗ്യത
1. വായ്പയെടുക്കാൻ ആഗ്രഹിക്കുന്നവർക്ക് ബാങ്കുകളിലോ ധനകാര്യ സ്ഥാപനങ്ങളിലോ യാതൊരു വിധത്തിലുളള ഇടപാടുകളും ഉണ്ടായിരിക്കരുത്.
2. ബിസിനസ് ആരംഭിക്കുന്നതിനുളള കൃത്യമായ ആശയം ഉണ്ടായിരിക്കണം,
3. 18 വയസിനും 60 വയസിനുമിടയിലുളളവർക്ക് അപേക്ഷിക്കാം.
4. ഒ​റ്റയ്‌ക്കോ സംഘമായോ ബിസിനസ് ആരംഭിക്കാൻ ആഗ്രഹിക്കുന്നവർക്കും അപേക്ഷിക്കാം.

വായ്പയ്ക്ക് അപേക്ഷിക്കാൻ ആവശ്യമായ രേഖകൾ
1. തിരിച്ചറിയൽ കാർഡ്
2. പാൻ കാർഡ്
3. നിലവിലെ മൊബൈൽ ഫോൺ നമ്പർ
4. പാസ്‌പോർട്ട് സൈസ് ഫോട്ടോ
5. താമസ സർട്ടിഫിക്ക​റ്റ്
6. ബിസിനസ് ലൈസൻസ് തുടങ്ങിയവ

അപേക്ഷിക്കേണ്ട രീതി
1. വായ്പ എടുക്കാൻ ആഗ്രഹിക്കുന്ന ബാങ്ക് സന്ദർശിക്കുക.
2. ബാങ്ക് ഉദ്യോഗസ്ഥരിൽ നിന്നും വായ്പയുമായി ബന്ധപ്പെട്ട വിവരങ്ങൾ ചോദിച്ച് മനസിലാക്കുക.
3. വായ്പയുടെ അപേക്ഷ ഫോറം പൂരിപ്പിച്ച് നൽകുക.
4. ആവശ്യമായ രേഖകളുടെ ഫോട്ടോ കോപ്പി അപേക്ഷ ഫോറത്തോടൊപ്പം ചേർത്താണ് ബാങ്ക് ഉദ്യോഗസ്ഥന് സമർപ്പിക്കേണ്ടത്.
5. നിങ്ങൾ സമർപ്പിച്ച രേഖകൾ ബാങ്ക് പരിശോധിക്കുകയെന്നതാണ് അടുത്ത ഘട്ടം
6. വായ്പ ലഭിക്കാൻ നിങ്ങൾ യോഗ്യരാണെങ്കിൽ കുറച്ച് ദിവസങ്ങൾക്കകം ലഭിക്കും.
കൂടുതൽ വിവരങ്ങൾക്ക് അടുത്തുളള ബാങ്കുമായി ബന്ധപ്പെടേണ്ടതാണ്.